Congress thalai ten Martar lungphun champha an hmang

Mizoram Pradesh Youth Congress Committee (MPYCC) chuan Inrinni kalta, June 27, 2026 khan kum 1966 atanga 1986 chhunga Mizoram buai vanga Ram leh Hnam tana Martar-te lungphun champhaphak vawi 27-na chu CTI Sesawng-ah an hmang.

He hunah hian MPYCC Senior Vice President Ngurdingpuia Pachuau chuan, “Vawiin kan thlen theih nana nunna hlu tak hlantu Martar te Congress Thalai chuan kan ngaihlu a, remna leh muanna a awm theih nana mahni inphat a, lal thutthleng kiantu Pu Lal Thanhawla leh a thawhpuite kan chhuang takzet a ni,” a ti a. “Martar chhungte sawrkar hna hrang hrang 70 chuang- Assistant 2, UDC 4, LDC 18, IV Grade 46 te chu Pu Lal Thanhawla kaihhruai Congress party in martar chhungkua te a pe a. PAMRA chhungkua 200 tan a bikin NLUP tanpuina pek niin NLUP Convergence atangin mi 120 pek leh an ni a. Martar chhungkua 40 hnenah rangva bundle 250 a pe a, martar chhungkua bik chhungkua 100 tan NLUP a bika pek an ni a. Kum 1986 atanga MNF sawrkar lai pawha an din sak theih loh Peace Accord Review Committee chu kum 2008 khan Pu Lal Thanhawla kaihhruai Congress party in a din sak a. He Committee hian martar-te chhungkaw tan hamthatna awm theite a dap sakin a ngaihtuah sak thin. Martar chhungkua mi 13 tan sawrkar hna a ngaihtuah sak bakah Central sawrkarah Housing Assistance chhungkaw engemaw zat tan a dil sak a ni,” a ti bawk.

CTI Sesawng-a Martar-te hriatrengna Lungphun hi Martar-te puala lungphun hmasa ber niin June 27, 1997 khan hawn a ni a, he lungphun hi MPYCC buatsaiha bultan niin kumtin June ni 27-ah Martar te pualin urhsun taka hun hman thin a ni a, he lungphunah hian mi 1168 ziah a ni tawh a. Kum 2014 khan Sergeant Lalduha ruhro pawh phum leh a ni bawk.