Chief Minister Lalduhoma’n Ministry siksawi ngai an tih loh thu a sawi

Chief Minister Lalduhoma chuan tun dinhmunah a Ministry siksawi ngai an ti lo tih sawiin, an sawrkar-ah mipuite an inti neitu em em niin a sawi.

ZPM Party chuan nimin khan Aizawl-a an Party Office-ah Chhung Inkhawm neiin he hunah hian Chief Minister Lalduhoma chuan term chanve an sawrkar tak thu leh mi tam tak ngaihdan ah chuan Minister te hna chanpual thlakthlengna lian tak thleng turah an ngai tih sawiin, “Kan Minister te an thawkrim a, an Department chan te an bel dawn chauh a, tun dinhmunah chuan Major Reshuffle hi ngai kan ti lo a. Hetih lai hian Central atanga thiltih ngai ang chi te leh Department inhnerem deuh tur te chu tih danglam zeuh zeuh kan nei thung a, Minor Reshuffle hi vawi 10 dawn lai kan lo nei ve tawh a, a boruak azir zelin kalpui chhoh a ni ang,” a ti a. “Kum tam tak chhung kan policy te kan lo vahvaihpui tawh a, party mite thawhrimna leh mipui te avanga sawrkar kan ni. Party mite chuan theihtawp chhuah a, sawrkar tuma hmalak kha an tih tur reng a nih laiin Mizoram mipui nawlpuiin min duhsak a, min tawngtaipui a, an duhsakna min hlan vanga sawrkar kan ni hi kan theihnghilh tur a ni lo. Kan Party hmingah pawh People’s Movement kan nih angin, mipui nawlpui pen rual zela kal tur kan ni a, mipuite pawh tunhma sawrkar ai khan keini-ah chuan an inti neitu em em a, chuvangin mipui kan dah pawimawh hle tur a ni,” a ti bawk.

Chief Minister chuan, “Sawrkar a that leh that loh ah hian eng tehfung nge kan hman? Kan thil dil a hlawhtlin chiah loh avanga sawrkar sawisel chiam mai kan ni em? Kan mimal duh dan leh kan hamthatna atanga kan teh chuan sawrkar hi teh tlin a har khawp ang. Sawrkar tha kan tehna tur chuan kan auhla kan umzui em? MLA te hnathawh a tha tawk em? tih te hian I teh ang u,” a ti a. “Bible-a Joshua chanchin ang deuh khan keini pawh hi Israel hnam 12 te angin Minister 12 kan nei a, kum hnih leh a chanve chhung ram kan la tawh, kan thlen chinah lungawithlak viau mah se ram lak tur kan la ngah hle. Minister te hian an chanpual hrang hrang Department theuhah ram lak tur hmachhawp an la ngah viau mai. Corruption lakah te, System chhe lutuk lakah te, hnathawh quality chhe lutuk lakah te ram lak tur kan la ngah hle. Chawl thei kan la ni lo,” a ti a. “Kei ngei pawh hi upat lam pan ka lo ni ve ta a, in mi duhsakna azarah pa ber dinhmun ka chang a, hemi chanvo ka chelh chhung hi chuan a tam thei ang ber ram lakpui che u ka tum a ni,” a ti a. “Pathian hnenah hian, ‘Rei tak CM nihna chanvo hi min chelh tir rawh’ tiin ka dil ngai lo, ‘Kei aia tha zawk, tisa leh thlarau lama chak zawk min pe rawh,’ tiin ka dil thin. Hruaitu nih hi a chuha chuh chi a ni lo, amahin a lo piang mai. Kan party phei chuan danglam bikna kan nei a, chu chu Val Upa Council kan nei hi a ni. Chief Minister tur hi Val Upa Council ten an ruat thin,” a ti bawk.