Bana Kaih Scheme hnuaia hmalakna te thlirho a ni

Nimin khan Bana Kaih Scheme hnuaia Chief Minister Special Package leh Loan Component dilna lut tharte thlirin Planning & Programme Implementation Department Committee Room-ah Mizoram State Project Coordination Committee (MSPCC) leh Implementing Department Nodal Officer-te chu an thukhawm.
He thutkhawm ah hian Bana Kaih Scheme hnuaia Implementing Department pasarih (7) atanga Chief Minister Special Package leh Loan assistance dilna lutte thlîrho niin Cooperation Department hnuaiah dilna 8, Horticulture Department-a pakhat, UD&PA Department hnuaia 7, LESDE hnuaiah 10, Tourism Department hnuaiah 10, Land Resource, Soil & Water Conservation hnuaia 11 leh Commerce & Industries Department hnuaia dilna lut 378-te en a nih bakah Loan assistance dilna lutte endik a ni bawk.

Hei bakah hian Serchhip District-a TRIBES leh ATMA Serchhip District kaltlanga NABARD hnuaia Tribal chhungkaw dinhmun chawisanna tur, Bana Kaih Scheme te nen tangkawpa hmalakna thlirho a ni a. Hei hian kuthnathawka eizawng chhungkaw 400 bakah puantah leh puanthui a eizawng chhungkaw 100 a tuam a. Hualtu, Hmuntha, Khawbel, Sialsir, Serchhip, Chhiahtlang leh Thenzawl-ah Tung, Chhawchhi, Litchi, Lakhuihthei leh Sawhthing hmun siam turin ruahmanna kalpui mek a nih thu tarlan a ni a. He program kalpui nan hian chhungkaw pakhat tan TRIBES atangin Rs. 80,000 bawr vel chu NABARD-in a tum sak anga, Bana Kaih Scheme atangin Sawrkarin Rs. 19,000 bawr vel a tum dawn bawk a, Serchhip District ATMA Project Director Lalchhuansangi chuan hemi chungchang hi a sawifiah bawk a ni.

Hei bakah hian Biofertilizer uar zawka hman pawimawhzia sawiho niin, Agriculture, Horticulture leh AH&Vety thawhhona a tul zia sawilan a ni a, Mizoram chu Organic State ni turin ‘Biofertilizers’ siamchhuah leh nasa zawk a hman a pawimawhzia zirtirna kalpui a nih theih nan Bana Kaih Scheme chu tangkai taka hman a nih tur thu sawi a ni a. Tun dinhmuna Biofertilizer kan hman dan leh kan mamawh dan zirchiang turin Task Force din relin, Sawhthing tharchhuahte vawnthat reng an nih theih nan leh kuthnathawkten an tharchhuahte rualkhai zawk leh man tha zawka an hralh theih nan Bana Kaih Scheme hnuaiah hian Root Cellar siam hna chu kalpui ngei nise an ti a. Bana Kaih Scheme hnuaia CM Special Package leh Loan Assistance dawngtute hmasawnna tehfung chhinchhiahna tur duanchhin, Achievement Report Format pawh enho niin Foreign placement loan leh Education Loan chungchângte thlirho a ni a, Industrial & Processing Unit-te tana Last Mile Connectivity Support pek dan tur inkaihhruaina siamte thlirho a ni bawk.