A&C Minister in hmanpui

Nimin atang khan Aizawl Chanmari YMA Hall-ah ‘State Level Library Seminar & Training for Government Recognised Libraries’ chu a vawi 14-na atan neih a ni a, Art & Culture Minister C. Lalsawivunga chuan a hmanpui a ni.

Ni 2 awh tur he Training-ah hian Art & Culture Minister chuan Library pawimawihna sawiin, Hriatna tipungtu, hmasawnna kawng min zawhtir theitu, zirna leh thiamna lama puitu tha tak a nih thu a sawi a, Library-te ngaihhlut leh roh nachang hriat pawimawh a tih thu a sawi bawk a. Lehkhabu te a nihna tur dik taka hman an nih chuan an tangkai em em tih sawiin, “Internet-khawvel-ah kan cheng a, chu chuan kan nun dan a thlak danglam avangin hmasawnna kawngah nasa takin min pui bawk mah se, chin dan tha lehkha chhiar i thlahthlam phah lo ang u,” tiin he huna tel te chu a chah bawk.

Art & Culture Minister chuan sawrkarin Library-te hmasawnna tur a ngaipawimawh tih sawiin, India ram pum huapa Public Library te tih hmasawnna tur atan Ministry of Culture hnuaia Autonomous Organization, Raja Rammohun Roy Library Foundation (RRRLF) chuan tanpuina an pekchhuah thin thu leh Matching Scheme leh Non-Matching Scheme-ah thenin Matching Scheme hi 90:10-in Central leh State share a kalpui a nih thu a sawi a. Building grant pawh cheng nuai 6 zelin NGO Library 137 ten an dawn tawh thu leh Steel Book Rack (Godrej) pawh Library 426-ah semin kumtin recognised NGO Library te hnenah Lehkhabu thar sem thin a nih thu a sawi a. Kum hmasa lamah Library 34 hnenah Computer sem a nih thu pawh sawiin, Digital hmasawnna nen Library service tihchang-tlunna atan a tangkai thu a sawi bawk. Minister chuan Aizawl-ah Mizoram State Library a awm thu leh Aizawl, Lunglei, Kolasib leh Champhai-ah District Library a awm bakah recognised NGO Library 518 a awm mek thu a sawi bawk.