LENKAWL ADS (Computer zir duh tan 6) :

Mizoram-a rawn zin Arunachal Pradesh University-a Mass Communication Post-Graduate 2nd year zirlaite chuan nimin khan Information, Public Relations, Printing & Stationery (IPRP&S) Minister B. Lalchhanzova chu a Pisa-ah an kawm.

He inkawmna ah hian IPR P&S Minister B. Lalchhanzova chuan Arunachal Pradesh atanga lo zin zirlaite chu lo lawmin Hmarchhak State thalaite zingah hian thiamna leh theihna tam tak a awm tih a sawi a; chutiang thiamna chu an hman chhuah theih nan rilru zau zawka ngaihtuahna hman te, an ngaihdan tlang taka sawichhuak thin tur te, mahni inrintawkna neih pawimawh zia te leh mahni Comfort Zone atanga chhuah a pawimawh zia a sawi a. Hei bakah hian Minister chuan Arunachal Pradesh zirlaite chu hmarchhak State dangte nen thawhhona tha nei a, inunauna leh inpumkhatna rilru nei reng turin a chah bawk a; hei hian anmahni State chauh ni lovin Hmarchhak Bial leh India ram pum hmasawnna a thlen theih thu a sawi bawk.

He hunah hian PIB Aizawl Head of Office Dr. Rajeev Lourembam chuan Central Sector-a Journalism chanchin a sawifiah a. Mass Communication an zir zawh hnua eizawnna kawng hrang hrang awm theite pawh zirlaite chu hrilhin, tawnhriat an ngah lehzual nan leh Industry mamawh dante mila an thiamnate tipung zel turin zirlaite chu a chah bawk.

Nimin-a inkawmna hun hi IPRP&S Department Joint Director Mina Zoliani Joute chuan kaihruaiin PS to Minister Remlalliana Hnamte pawhin Social Media avangin mi zawng zawng chu journalist ang an ni vek tawh tih a sawi a, Social Media in thatna tam tak a neih laiin that lohna pawh a neih thu a sawi a. Ani bakah hian Mizoram Journalist Association President Vanlalrema Vantawl pawhin Mizoram-a Journalism kalphung te hrilhfiahin The Frontier Despatch Editor Adam Saprinsanga pawhin zirlaite hnenah hian thu a sawi bawk a ni.