YMA hi kan tan ram rotling a ni - CM

Chief Minister Lalduhoma chuan YMA chu kan tana ram rotling a nih thu a sawi.

Nimin khan Khawzawl Vengthar YMA Hall-ah Khawzawl Sub-Headquarters YMA Conference vawi 2-na chu Chief Minister hian khuallian nia hmanpuiin Mizoten YMA kan nei chu kan nihlawh hle tih sawiin, “YMA anga mi zawng zawng huikhawm a, khawtlang thuiphui thei pawl hi ram dangah an awm ka ring lo hial. Chuvangin, YMA hi kan tan ram rotling a ni,” a ti a. Kan thalai tam tak ten ruihhlo an ngaih avangin YMA hian kumpuan-ah ‘Ruihhlo Do’ a hmang mek tih pawh sawiin, Sawrkar pawhin ruihhlo hi an do nasat thu leh a ngawlveite chhanchhuahna pawh kalpui a nih thu sawiin, “Kan hmalakna tinrenga kan kutke pawimawh ber chu YMA in ni deuh zel a. In chungah kan lawm hle,” a ti a ni.

Hei mai bakah hian YMA chu Zonun ze mawi tinrengte chhawm nunga, thangtharte hnena zirtirtu a nih thu pawh Chief Minister chuan sawiin “Tunhnaiah Mizoramin khualzin kan ngah hle a, min rawn tlawhtuten min fak fona pakhat chu kan Zo nun ze mawi tak tak an rawn hmuhte hi a ni. Nghahloh Dawr ringawt pawh hian an thinlungah thu a sawi nasa em em thin. Tunah chuan Zo nun ze mawi hi khualzinte hip thei khawpa mihring nun mawi a ni tan ta a. Ka zain i uar deuh deuh ang u. YMA pawh lo tang sauh sauh rawh u,” a ti bawk.

Khawzawl Sub-Hqrs. YMA Inkhawmpui Vantlang Inkhawm hi Sub-Hqrs. YMA Vice President Vanlalsawma Colney chuan kaihruaiin Central YMA General Secretary Prof. Mal-sawmliana chuan YMA kumpuan ‘Ruihhlo Do’ tih thupui hmangin thu a sawi a. Khawzawl Sub-Hqrs. huamchhungah hian Group YMA pali leh Branch 42 awmin Member 19,899 an awm mek a ni.