Union Minister of State for Consumer Affairs-in Khawzawl a fang

Union Minister of State for Consumer Affairs, Food And Public Distribution,Nimuben Jayantibhai Bambhaniya-i chuan nimin khan Khawzawl-a sawrkar hmun pawimawh leh hmalakna hrang hrangte a hmunah a tlawh.

Union Minister hian National Highway-6 tlawh hmasa berin, NHIDCL hotute chu Highway an siam chhung leh enkawl chhung tur te a zawt a, uluk taka kawng siam leh enkawl hna thawk zel turin a fuih a. KVK Khawzawl pawh tlawhin ama puala Exhibition Stall an lo buatsaih chu lawmawm a tih thu leh lian tham zawk leh School naupang pawhin an chhim theih tura buatsaih ni thei se tiin thurawn a pe a. KVK hmalakna hrang hrang te chu tha a tih thu sawiin, an hmalakna hnuaia kuthnathawktu mi 5 laiin National Award an dawng thei chu lawmawm a tih thu a sawi bawk.

Hemi hnu hian Khawzawl Kawnzar-a Public Distribution System Godown leh Electric Veng-a Fair Price Shop te tlawh lehin beneficiary-te nen an inkawm a, District Hospital pawh tlawhin Damdawi In Pharmacy-ah Jan Aushadhi kalpui a ni em tih zawtin, License apply mek a nih thu an lo hrilh a ni a. Ayushman Bharat Health infrastructure mission (PM ABHIM) hnuaia sak (Integrated Public Health Laboratory (IPHL) pawh a tlawh bakah Electric Veng Anganwadi Centre leh Khawzawl district chhunga Samagra Siksha hnuaia Primary School awmchhun Little Flower Primary School te a tlawh nghal bawk a ni.