Union Minister leh Chief Minister te an inkawm

Nimin-a Mizoram rawn thleng Union Minister for Fisheries, Animal Husbandry & Dairying leh Panchayati Raj, Rajiv Ranjan Singh leh Chief Minister Lalduhoma te chu nimin khan Chief Minister Bangla-ah an inkawm a, Union Minister hi Union Minister of State for Fisheries, Animal Husbandry & Diarying George Kurian leh Central Official lian ten an rawn zui a ni.
He inkawmna ah hian Chief Minister chuan Mizoram a rawn tlawh avanga Union Minister hi lawmthu hrilhin, Mizoramin a hlawkpui ngei a beisei thu a sawi bakah Fisheries leh AH & Vety lama Mizoram mamawh hrang hrangte a sawipui a ni.

Union Minister hian Mizoram in mamawh a lo thlen tawh Whole Sale Fish Market sakna te, Integrated Aqua Park sakna tur te, District tam zawkah Paddy cum Fish Culture chu tam zawka Cluster kalpui te chu tihhlawhtlinsak a tum thu Chief Minister hi a hrilh a. Sangha Dil thar laihna te, a awmsa tihlen leh cheina te, Sangha khawitute tanpuina lam hmalakna te chu Prandhan Mantri Matsya Sampada Yojana (PMMSY) 2.0 a rawn chhuak thuai dawn tih hrilhin, Mizoram-a a kalpui dan tur tha an mamawhte chu thehlut tur leh PMMSY 2.0-ah hian bilh luh an tum tur thu a sawi a ni.

Chief Minister thu thlen dang Milk Processing Plant dinna tur chungchang ah Central Scheme kalpui mek, State Share-a 25% ni thin chu Scheme thar an siam mek tih a sawi a, “Central leh State share hi 90:10 a ni tawh dawn a. In project te chu Scheme thara thun tura tih a thain a rinawm,” a ti a. Mobile Veterinary Unit sanction pawh mamawh zat rawn sanction an tum tur thu sawiin, “Sanction in hmuh tawh chin kha lo kalpui phawt ula, rawn sanction leh kan tum dawn nia,” a ti a. Transport Subsidy for Animal Feed pawh an lo bawhzui tur thu sawiin, “Ranchaw (Animal feed) lam hi chu Mizoram-ah hian nasa zawkin kalpui (local plantation uar) ila a tha berin ka ring,” tiin Chief Minister thu thlente hi bawhzui a tum thu a sawi a ni.