Kumin ah sawhthing quintal 1,36,985 lei tawh; Nikum a lei zat lei phak lohna erawh a la tam

Mizoram Agriculture Marketing Board (MAMB)-in Mizoram-a thar Sawhthing lei leh hralhna tura a ruahman Secondary Collection Centre (SCC)-ah Sawhthing quintal 1,36,985.96 lei/hralh a ni tawh a. Nikum lama Sawhthing lei zat erawh a la phak lo hle.
Mizoram State sawrkar chuan kumin hian February ni 2, 2026 atangin SCC kaltlanga Sawhthing lei/hralh hun a hawng a, ruahman dan chuan May 30, 2026-ah a tawp dawn. MAMB hotute hnen atanga thudawn danin, May ni 14, 2026 thleng khan SCC hrang hrangah sumdawngte’n kut hnathawktute Sawhthing an lei tawh a, heng SCC atang hian sumdawngte hian Sawhthing qtl 1,36,985 lei tawhin hei hi kg 1,36,98,596.18 a ni a, Rs 34,40,53,320.14 man a ni.

Sawhthing hi SCC hrang hrangah an hralhna man (rate) a inang lo a, sawrkarin a baa lei a phal loh avangin sumdawngte hian Sawhthing an leina man hi kuthnathawktute hnenah an pe nghal zel a ni.

Nikum 2025 chhung khan Mizoram sawrkarin kuthnathawktute Sawhthing thar kg. 3,38,35,182 (quintal 3,38,351.82) a lei a, Sawhthing leina atan cheng vbc. 137.72 sen a ni. Mizoram District hrang hrang zingah Champhai District-ah Sawhthing lei tam berin quintal 82,268.41 lei a ni a, a dawttu Serchhip District-ah quintal 62,479.23 lei a ni. Khawzawl District-ah quintal 56,108.17 leh Saitual District-ah quintal 47,546.81 lei a ni bawk a. Siaha District-ah Sawhthing hralh tlem berin quintal 2,922.22 an hralh a, Lawngtlai District quintal 3,826.69-in an dawt bawk a ni. Heng bakah hian Lunglei District-ah quintal 32,941,62, Aizawl District-ah quintal 18,403.33, Hnahthial District-ah quintal 18,090.13, Kolasib District-ah quintal 3882.69 leh Mamit District-ah quintal 9882.52 te lei a ni bawk.

Kumin May ni 14 thlenga Sawhthing lei tawh quintal 1,36,985.96 hi nikum a Sawhthing lei zat quintal 3,38,351.82 aiin a la tlem hle a, kumin aia nikum a Sawhthing lei zat tamna hi quintal 2,01,365.86 a la tling a ni.

Tarlan tawh angin Serchhip District chhungah chuan SCC hrang hrang ten Sawhthing lei tur ang ang hi an lei zo thawkhat tawh nia thudawn a ni a, kumin hian a tir lamah Sawhthing rate hi tha lutuk lovin hralh mai theih a ni lo a, amaherawh chu April thla chawhnu lamah erawh chun sumdawng ten an leina rate hi sang chhoin May thla ah chuan Sawhthing rate a that avangin Support Price pek ngai lo turin sumdawngte hnenah hian an hralh hlawm a ni.