Chhuanthar Tlangnuam-ah puantah zirna leh puantahna khawl (Zo Loom) semna neih a ni

Mizoram Handloom & Handicrafts Development Corporation Limited (ZOHANDCO) hmalakna in nimin khan Chhuanthar Tlangnuam-ah Puantah zirna, Handloom Training leh puantahna khawl (Zo Loom) semna neih a ni a, Bialtu MLA leh Agriculture & Farmers' Welfare Minister PC. Vanlalruata chuan khuallian niin a hmanpui a ni.
Chhuanthar Tlangnuam CT Hall-a he hun hman ah hian Bialtu MLA leh Agriculture & Farmers' Welfare Minister PC. Vanlalruata chuan Chhuanthar Tlangnuam mipuite taihmakna leh thawhrimna fakin, puantah lama hma an lakna turah pawh beiseina sang tak a neih thu a sawi a. Puan-a sumdawnna chu Mizoram economy chawinungtu pawimawh tak pakhat a nih thu sawiin, Mizo kutchhuakte chawinung tura ZOHANDCO te hmalakna ah lawmthu a sawi bawk. Agriculture Minister chuan ZOHANDCO kaltlangin ram pawna Mizo kutchhuak puan leh thiamhnangdeh chi hrang hrangte zawrhchhuahna tur pawh zawn zel a nih thu sawiin, India ram khawpui hrang hrang - Delhi, Bangalore leh Kolkata-ah te pawh Mizo kutchhuak thil zawrhna ‘Made By Mizo’ dawr hawnna tur pawhin hmalak mek a nih thu leh inbiakna kalpui mek a nih thu a sawi bawk a. Mizote kutchhuak chawisan chu sawrkarin a ngai pawimawh hle tih sawiin, ZOHANDCO hmalaknaa Chhuanthar mipuite tana puantah khawl 9 zet sem theih a ni chu lawmawm a tih thu a sawi a. Training turte pawh thiamna tak tak pawchhuaka, mahni ke-a ding thei tur leh Mizoram tana malsawmna ni turin duhsakna a hlan a ni.

Nimin-a he hun hman hi ZOHANDCO Managing Director L.P. Lalchangkima chuan kaihruaiin ZOHANDCO Chairman J.K. Dawngzuala hnen atangin an hmalakna tlangpui ngaihthlak a ni a; ZOHANDCO Asst. Manager Rodingluaia chuan Training kalpui dan tur leh puantah khawl chungchanga Technical Report a pe bawk. He hun hmanpuitu Mizoram Khadi & Village Industries Board (MKVIB) Chairman C. Lalremliana pawhin thu sawiin, Mizo thalaite’n Mizo thiamhnangdeh lamah inzirtirna leh training uar lehzuala kan neih a pawimawh thu a sawi a. Multi-Disciplinary Training Centre Aizawl-ah Training duh tan kawng a inhawn thu a sawi bakah Chhuanthar Tlangnuam Village Council President Dawngzela'n lawmthu sawiin hun hi a khar a, chawhnu lamah Demonstration neih zui a ni.

Chhuanthar Tlangnuam-a Puantah zirna, Handloom Training hi thla khat (1) chhung neih phawt tur niin mi 45 an tel dawn a, Trainer thiam tak takte'n an thutchhilh dawn a ni. A tirah chuan puan bansa hmangin zirtirna an nei phawt dawn a, hei bakah hian mi 2 thlangchhuakin, puan ban, hnahchawi thil, reed thil leh a tul dangte zir belh turin Aizawl lamah training kalpui leh turin ruahmanna siam a ni bawk.