Special Intensive Revision (SIR) neih tur ah CEO in Political Party hruaitute a kawm

Election Commission of India (ECI)-in a bik taka Electoral Roll ennawnna, Special Intensive Revision (SIR) thawh thumna kalpuina tura a ruahman zingah Mizoram State a tel avangin nimin khan hemi chungchangah hian Political party hrang hrang hruaitute chu Chief Electoral Officer (CEO) Mizoram Dr. Lalrozama hovin an thukhawm.

CEO Pisa-a thutkhawm ah hian Dr. Lalrozama chuan Electoral Roll-a dik lo leh fello awm theite enfiahna kawngah Official te chuan uluk taka hma an lak tur thu sawiin, Party hrang hrangte thawhhona pawimawhzia a sawi a, vote neihna list dik leh tha neih chu Election felfai leh rintlak neihna atan a pawimawh thu a sawi bawk a. SIR-ah hian kum 2005-a Mizorama Intensive Revision lo neih tawha Electoral Roll leh kum 2025 Electoral Roll chu enmil a nih thu sawiin, “Kum 2005 E. Roll-ah hian voter 5,59,123 awmin kum 2025 E. Roll-ah hian voter 8,75,004 an awm thung a. Kum 2005 leh kum 2025 E. Roll enmila, E. Roll a hming chuang te leh an thlahte mapping tihhlawhtlin zat chu Vawiin thlengin 80.54% a ni tawh a, mapping hi neih mek a nih avangin ni tin a pung zel a ni,” a ti.

He hmalakna ah hian kar tharah khian District tina DEO ten Enumeration Form (EF) chu print-in hei hi ni 3 chhunga peihfel tura beisei an nih thu CEO chuan a sawi a, He Enumeration Form nen hian May 30 atanga June 28, 2026 chhungin BLO te chu In (household) tinah vawi thum aia tlem lo an kal dawn a. Hemi hun chhung hian In lama biak theiha lo awm hram turin CEO chuan mipuite a ngen bawk. Enumeration Form thehlut lo te chu Draft Roll-ah an hming a chuan dawn loh avangin Enumeration Form thehluh hi ngai pawimawh turin mipuite a chah a, hemi kawngah hian Party hruaitute pawh thu thehdarh kawngah tan la lehzual turin a chah a. District tinah ‘Help Desk’ neih tum a nih thu a sawi bawk.

He hunah hian Joint CEO Ethel Rothangpuii chuan September ni 16, 2025-a Political Party zawng zawng (recognized National & State Party) te hnena Polling Station tina Booth Level Agent (BLA) ruat tura ngenna an tihchhuah tawh chu ngaipawimawh lehzual turin Party hruaitute chu a chah a. BLA mawhphurhna leh pawimawhzia sawiin, Electoral Roll buatsaihna kawngah anmahni Bialtu Booth Level Officer (BLO) bakah Electoral Registration Officer (ERO) leh Assistant Electoral Registration Officer (AERO) te tanpuitu an ni, a ti a. India khua leh tui dik tak Electoral Roll-a hming chuang thei tawh phawt chu hmaih awm lova ziah luh an nih theih nan leh Electoral Roll a chuang lo tur ziahluh an nih loh nana endiktu pawimawh tak an nih thu sawiin, AAP hian BLA an la inruat loh thu leh BJP-in 294, INC-in 1045, MNF-in 868 leh ZPM-in 1223, an vaiin BLA 3430 ruat an ni tawh thu a sawi bawk.