Serchhip Tuikhuah Veng-ah Retaining Wall siam thar a chim

Nimin (May 25, 2026) tlai-ah ruahsur ah khan Serchhip Tuikhuah Veng-a Retaining Wall siam lai pakhat chu chimin mihring thi leh hliam na lutuk an awm lo hlauh nia thudawn a ni.
Thudawn danin he Retaining Wall siam hna hi Directorate of Hospital and Medical Education (DHME) hnuaia thawh niin kawngpui (Main Road) atanga Health Department ram, District TB Centre leh Quarters thenkhat awmna ram dawlna tura RCC hmanga siam a ni a, he hna hi Hnahthial khaw mi C. Zoremsanga thawh niin kumin March thla tir lama tan niin tunkar chho ah hian zawhfel tum a ni a. Nimin ruahsur lai, tlai dar 4:10 vel khan a ban chawp-a rawn tluin kawngpui-a tlan Auto Rickshaw pakhat hmalam chu a delh a, a khalhtu Lalmuanpuia, AOC Veng, Serchhip chuan hliam a tuarin Serchhip damdawi In panpui nghal a ni a, a dinhmun erawh a hlauhthawnawm loh nia hriat a ni.

Thudawn danin he Retaining Wall siam hi hnathawh a nih laiin a tha tawk lo nia hriat a nih avangin Sub-Hqrs. YMA Vigilance & Monitoring Committee-ah thlen niin enfiah a nih hnuah Vantlang Viltu kaltlanga thuneitute hnena thlan leh a ni a, hemi hnu kumin April 14 khan thuneitute chuan a hmunah kalin an enfiah a, hemi tum hian Village Council ten kawngpui atanga ft. 5 vela tawlh hnung tura an ngen avangin estimate anga a slope theih loh thu an sawi a. Hemi tum hian rintlak taka hna thawk turin hnathawktute hi chah an ni bawk. Nimin-a Retaining Wall chim ah hian lei erawh a chim lo niin a lang a, RCC chhun chin zawng a chim niin a lang. He thil thleng hi DHME-a hotute pawh hriattir nghal niin Vawiin lamah hian an rawn tlawh an tum nia thudawn a ni bawk.