Loneitute mi 3700 te chin tur Behliang chi vailiam a ni

Agriculture & Farmers Welfare hnuaia scheme pakhat, Pulses Mission hnuaia District hrang hranga loneitu mi 3700 te chin tur Behliang chi quintal 245 chu nimin khan Directorate of Agriculture & Farmers Welfare Office tual atangin Agriculture Department Minister PC. Vanlalruata chuan a vailiam.
Behliang chi vailiamna hunah hian Agriculture Minister chuan India ram chu Be lam chi-ah a intodelh loh thu sawiin, ramdang atanga kan mamawh tam zawk lakluh mek a nih thu a sawi a. Sawrkar laipui chuan Be lam chi-a kan intodelh theihna turin Scheme pawimawh tak, Pulses Mission a lo duang chhuak a, he Scheme hnuaiah hian Mizorama loneitu ten Behliang hi ram tin 6000-a zau-ah an ching dawn tih a sawi a ni.

Agriculture Minister PC. Vanlalruata chuan Behliang mu ro chu Price Support scheme hnuaiah Central sawrkar agency NAFED chuan Minimum Support Price (MSP) angin kg 1 ah Rs. 84.50-in Collection Centre-ah an lei sak vek dawn tih a sawi a. Hetiang a hralhna awmsa veka thlai chin chu loneitute tan a phurawmin, tih tak taka ching leh enkawltute chuan sum tam tak an hailut thei dawn tih a sawi a. Behliang bakah Chhawhchhi kg. khatah Rs. 103 leh Nihawi kg khatah Rs. 83 hisapin loneitute tharchhuah ang ang te chu NAFED hian an lei sak vek dawn tih a sawi bawk a. Heng Agriculture thlai pathum (3) - Behliang, Chhawhchhi leh Nihawi te hi tlangram loneituten a tam thei ang ber an lo thar a, an sum lak luh a lo pun theih ngei na turin Agriculture Department chuan theih tawp a chhuah dawn thu a sawi a. Agriculture lama hma kan sawn zel theih nan leh tuna Price Support Scheme hmanga Behliang, Chhawhchhi leh Nihawi sawrkarin a lei tur pawh hi a hlawhtlin ngei theihna turin loneituten theihtawp lo chhuah turin a ngen bawk a ni.

Nimin-a he hun hman hi Agriculture & Farmers Welfare Department Secretary Ramdinliani chuan a kaihruai a ni.