Serchhip-a ‘NMBA Hriselna Kutpui’ mipui ten an hlut

Serchhip DC Office Complex-a ni hnih (2) chhung awh ‘NMBA-Hriselna Kutpui’ neih chu nimin tlai khan zawhfel a ni ta.
‘NMBA-Hriselna Kutpui’ kharna hun hi nimin chawhnu khan Serchhip DC Pisapui Hall-ah neih niin he hunah hian DC Paul L. Khuma chuan Serchhip-a Doctor indaih lohna avanga mipuite’n harsatna an tawh thinte chhawk zangkhaina tura ‘NMBA-Hriselna Kutpui’ hi buatsaih a nih thu sawiin, tih hlawhtlin a nih theih nana hun leh tha sengtu zawng zawngte chungah lawmthu a sawi a, he hun hmanga kalkhawm mipui leh zirlai rualte chu khua leh tui tha, rilru leh taksa hriselna ngai pawimawh mi nih tum theuh tur leh mi dangte tana malsawmna ni tura nun kawng dik zawh theuh turin a fuih a ni.

‘NMBA-Hriselna Kutpui’ kharna inkhawm hi SDO (Sadar) Rebecca Laldinmawii Hrahsel chuan kaihruaiin Kut puala buatsaih Inter-School Public Speaking Competition-a ti thate hnenah lawmman sem mipuite rawn theih tura rawn thu Doctor-te hnenah Serchhip Bawrhsap chuan lawmthu sawina thilpek a hlan bawk a. Inter-School Public Speaking Competition hi Serchhip District chhunga High School leh Higher Secondary School zirlaite tana buatsaih niin, School hrang hrang 10 atangin zirlaite an intihsiak a, a pumpuiah Samuel Lalramchhana, Millenium High School, Chhiahtlang chu pakhatna niin, Lalhunmawii, Brilliant Higher Secondary School, Serchhip chu pahnihna ni a, R. Lallianpuia, Sainik School, Chhingchhip chu pathumna a ni bawk a. Lawmman latute hnenah hian tangkafai leh Certificate pek an ni a. Serchhip DC Office-a Sub-Deputy Commissioner Lalchhanhimi’n lawmthu sawiin hun hi a khar a ni.

Serchhip-a NMBA-Hriselna Kutpui hi mipuite’n an hlut hle a, Serchhip Doctor te bakah Aizawl atangin natna hrang hranga thiam bikna nei Doctor rualte chahchhuah niin, a ni khatna (14th May)-ah inentir tura hmingziak mi 672 awmin, a ni hnihna-ah mi 789 zet an awm bawk a ni.