Serchhip-ah NMBA-Hriselna Kutpui neih tan niin inentir tura hmingziak mi 672 an awm nghal

Nasha Mukt Bharat Abhiyaan (NMBA) Serchhip District hmalakna in hriselna kawnga harsatna nei ten man chawi lova Doctor thiam an pan theihna hun, ‘NMBA-Hriselna Kutpui’ chu nimin khan Serchhip DC Office Complex-ah neih tan a ni a, Vawiin hian chhunzawm lehin zawhfel a ni ang.
‘NMBA-Hriselna Kutpui’ hawnna hi nimin chawhma dar 10:00 khan Serchhip DC Pisapui Hall-ah neih niin Serchhip DRDO Project Director Dr. Malsawmtluanga Fanchun chuan khuallian niin a hawng a, Nasha Mukt Bharat Abhiyan (NMBA) thiltum tlangpuite sawiin, Ruihhlo laka fihlim bakah khua leh tuite hriselna chu NMBA thil tum pawimawh tak a nih thu a sawi a, khawtlang hruaitu tha ni tur te, sawrkar hnathawk chak leh tangkai ni turte in hriselna leh nun dan (lifestyle) uluk chu thil pawimawh berte zinga mi a nih thu sawiin, ‘NMBA-Hriselna Kutpui’ ngaihtuah chhuaktu Serchhip Deputy Commissioner Paul. L. Khuma hnenah lawmthu a sawi a. He Hriselna Kutpui-ah hian chutiang inzirtirna hrang hrangte chu a duh apiang tan a thlawna buatsaih a nih thu sawiin, Serchhip-a Doctor indaihlohna a awm thin avanga mipuite tana harsat awm thinte pawh NMBA-Hriselna Kutpui kaltlang hian chhawk zangkhai tum a nih thu a sawi a, he Kutpui chhimtu mipuite chu hlawk taka he hun hi hmang theuh turin duhsakna a hlan bawk.

NMBA-Hriselna Kutpui hawnna hun hi SDO (Sadar) Rebecca Laldinmawii Hrahsel chuan kaihruaiin sawrkar Department hrang hrang hotute, khawtlang hruaitute leh Serchhip Doctor rualte bakah Aizawl atanga he Kutpui atana chahchhuah Doctor rualte an tel a. SDC Lalchhanhimi chuan lawmthu sawina hun hmanga Inkhawm hi titawpin hemi hnu hian Doctor thiam hrang hrangte chu mipuite tana rawn theih leh pan theihin an inhawng nghal a. Hemi rual hian Awareness hrang hrang - Rikrum thila nunna chhan dan (CPR pek dan, kangmei, chemical, electric shock, tui tla, Drugs OD leh adangte enkawl dan) te, Ruihhlo that lohna inzirtirna te, ei leh in, fitness leh stress management te, hmeichhiate hriselna inzirtirnate bakah Inter-School Public Speaking Competition (health & drugs awareness) te buatsaih a ni bawk.

‘NMBA-Hriselna Kutpui’ ni khatna ah hian Aizawl atangin Medicine Specialist Dr. PC. Lalramenga; Chuap leh thawkna lam Specialist Dr. Margaret Z. Khuma; Vun Specialist Dr. Nancy Lalnunpuii; Rilru lam Doctor (Psychiatrist) Dr. Malsawmtluangi; Ruh leh Tha lam Specialist Dr. Jonathan Lalrempuia; Mit lam Specialist Dr. Sabina Lalrinhlui; Hmeichhe natna lam Specialist Dr. Lalhruaimawia leh Ha Daktawr Dr. Margaret Zonunmawii te an tel a. Serchhip atangin BSF Doctor Dr. Krishnakant Pariha; Assam Rifle Doctor Captain Karnajit Rago leh Serchhip District Hospital atangin Dr. Fabian Malsawmkima leh Clinical Psychologist Jane Zodingliani Lailung te an thu bawk a. Inentir tura hming ziak mi 672 awmin Skin-ah 125, Medicine-ah 155, Psychiatry-ah 37, Ortho-ah 136, Eye-ah 99, Dental-ah 6, Gynae-ah 62 leh Pulmonary-ah 52 te an ni.