Serchhip-ah Bawrhsap hovin NCORD thutkhawm neiin ruihhlo dona a hmalak dan thlirho a ni
Serchhip DC Meeting Hall-a NCORD thutkhawm hi an Chairman leh Bawrhsap Paul L. Khuma chuan kaihruaiin ruihhlo dona kawngah sawrkar leh khawtlang hruaitute inkarah thawh hona tha tak awm thin chu lawmawm a tih thu a sawi a. Department tinte chu theihtawp chhuah zel tura chahin, hmalakna report felfai taka siam zel ni se a ti a. Dan bawhchhetute chungah hremna lekkawh a nih theih nan thawhhona tha tak neih zel a pawimawh thu sawiin, dan ang lova chetna lakah fimkhur tlang tur leh dan ang taka chak taka hma la turin kalkhawmte chu a fuih bawk a ni.
Serchhip SP leh NCORD Member Secretary Gavit Gogna IPS pawhin Police Department-te chuan ruihhlo do nan theihtawp an chhuah zel tur thu sawiin, ruihhlo kaihhnawihah mi man leh rinhlelhte chhuizui zel a pawimawh thu a sawi a, Department dangte nena thawhhona tha tak nei tura an inhawn reng thu a sawi bawk.
Nimin-a thutkhawm ah hian April 1, 2026 atanga Serchhip District chhunga ruihhlo dina kawnga hmalakna hrang hrangte thlirho a ni a. Report-a tarlan a nih danin, Police Department chuan hemi hun chhung hian Drugs kaihhnawihah mi 4 manin, Heroin gram 46.95 an man a, hei hi Rs. 9,39,000/- hu niin Zu chi hrang hrang Rs. 1,66,800 hu an man bawk a. NGO-te nen tangrualin Serchhip, Thenzawl leh North Vanlaiphai-ah te ruihhlo dapchhuah hna (Joint Patrolling) nei bawkin, ruihhlo kaihhnawih thubuaiah mi 6 Court-ah an thawn bawk a, Anti-Drug Awareness pawh tum li (4) an huaihawt bawk a ni.
Excise & Narcotics Department lam pawhin hemi hun chhung hian mi 3 man bawkin, Heroin gram 32.4 an man a, an mi man zinga pakhat chu hmeichhia niin, pakhat chu kum tling lo a ni a, kum tling lo hi Juvenile Justice Board (JJB)-ah thlen a ni.
He thutkhawm ah hian ruihhlo dona kawnga thawktu Department hrang hrang leh NGO aiawhte bakah Village Council aiawhte telin, Department hrang hrangte hnen atangin ruihhlo dona kawnga an hmalakna leh hmachhawp hrang hrangte ngaihthlak a ni a; ruihhlo do inzirtirna (awareness) chak zawka kalpui dan tur te, ruihhlo ngaite chhanchhuah leh enkawl zui dan (rehabilitation) chungchang te leh dan kenkawhna (enforcement) lam tihchak lehzual a nih theih dan turte sawiho a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!