Serchhip-ah ASF vanga Vawk thi leh suat a pung zel
Serchhip-a AH&Vety Department hotute hnen atanga LENKAWL in thu a dawn danin kumin chhungin Serchhip District chhunga Veng leh khua 12-ah ASF avanga Vawk thi leh suat hi awm tawhin nimin khan New Serchhip South-ah Vawk thi 6 chhinchhiah belh leh niin Serchhip Vengchung-ah Vawk 11 suat a ni leh bawk a. Kumin-a Serchhip District-a ASF vanga Vawk thi leh suat awmna te hi Serchhip Town huamchhung vek a ni.
Serchhip Town chhungah hian Serchhip Kawnpui North chu ASF vanga Vawk thi tamna ber la niin Vawk 116 a thih bakah Vawk 41 suat a ni tawh a, Serchhip P&E Veng-ah Vawk 111 thi tawhin 39 suat a ni tawh bawk a, Serchhip Veng-chung-ah Vawk 94 thiin 105 suat a ni tawh bawk a, Vawk hri leng tuartu hi chhungkaw 264 zet an tling tawh a ni.
Hetihlai hian Serchhip District Magistrate Paul L. Khuma chuan nimin khan thupek tichhuakin tunlai hian Serchhip khawchhung leh Chhiahtlang, Chhingchhip leh Lungpho-ah te ASF vanga Vawk thi leh damlo hmuh a nih thu tarlangin, Section 163 of Bharatiya Nagarik Suraksha Sanhita, 2023 tlawhchhanin Vawk lakluh chungchangah khapna a tichhuak a. Hemi ang hian Serchhip District-ah ramdang (Foreign Countries), State dang leh District dang atangin Vawk, Vawksa leh Vawksa atanga siam thil reng reng lakluh leh thawnchhuah khap a nih thu te; District chhunga Veng leh Veng, khua leh khua te Vawk inlak pawlh khap tlat a nih thu leh Vawk damlo reng reng talh leh hralh khap a nih thu te a tarlang a. Vawk damlo chu dahhran vat tur a nih thu te, AH&Vety Department-a thawk te hriattir vat tur a nih thu leh Vawk thi te chu uluk takin Disinfectant nen thuk taka phum tur a nih thu te a tarlang bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!