Sawrkar quarters dilna leh Mizoram House book-na hawng

Mizoram sawrkar General Administration Department enkawl sawrkar quarters luah dilna leh pekna online hmanga kalpuina, ‘Quarters Allotment Management System’ (QAMS) leh State pawna Mizoram House-te online hmanga book-na ‘Mizoram House Online Reservation System’ te chu nimin khan Chief Minister Lalduhoma chuan a hawng.

CM Conference Hall-a hemi puala hun hman ah Chief Minister Lalduhoma chuan sawrkar quarters luah dilna hi lehkha thehluh hmangin kalpui a nih thu leh Computer pakhatah dahthat a nih thu sawiin, “Hetia online hmanga kalpui a nih hi chuan quarters luah dilna hi a hmuna va lak a, va thehluh leh kher ngai lovin, awlsam takin internet kaltlangin a tih theih tawh dawn a. A enkawltute lam tan pawh a lo awlsam phah dawn a ni,” a ti a. “Chutiang bawk chuan Mizoram House pawh Office-a kala, va dil kher ngai lovin online hmang bawkin kan dil thei tawh dawn a. Aizawl pawna chengte tan phei chuan a hahdamthlak zual dawn a ni,” tiin GAD thawktute leh online portal siamtu ICT leh Mizoram State e-Governance Society te chungah lawmthu a sawi bawk.

Nimin a hawn tak Quarters Allotment Management System hi nikum August thla atanga buaipui tan kha a ni a. ICT Department te siam a ni a, tunah hian hman theih nghalin qams.mizoram.gov.in-ah luh tur a ni a. Nimin veka hawn tak Mizoram House Online Reservation System hi Mizoram State e-Governance Society te siam a ni a. Kumin March ni 2 atang khan enchhin tan niim Official-a hawn a nih hma hauhin dilna 2796 a lut hman a, mi 1640 te chu allotment pek an ni a. mizoramhouse.mizoram.gov.in ah luh tur a ni bawk ang.

Nimin-a he hun hman hi GAD changtu Secretary Sudhir Kumar chuan a kaihruai a ni.