Ruihhlo dona kawnga hmalakna kal mek thlirho a ni

Mizoram sawrkar in ruihhlo do beihpui a thlak mek thlirletna chu nimin khan Home Minister K. Sapdanga leh Excise & Narcotics Minister Lalnghinglova Hmar te kaihhruaiin neih a ni.

Home Minister Pisa-a he thutkhawm ah hian Home Department, Excise and Narcotics Department, Food and Drugs Administration leh Central YMA hruaitute bakah Aizawl DC leh SP te telin ruihhlo zuartute, ngawlveite leh ruihhlo zawrh leh inhlanchhawn dan kawng hrang hrang te an sawiho a. Ruihhlo do leh a hmangsualtute leh a zuartute laka beihpuithlak chhunzawm zel dan tur ruahmanna hrang hrang an ngaihtuah a ni bawk. Tun dinhmunah Mizoram-ah ruihhlo chi hrang hrang – Heroin te, Khuh damdawi chi hrang hrang te, Ganja leh ruihhlo dangte a hluar hle a. Aizawl bikah Café Culture uar thar avangin thalaite zingah ruihtheih thil hmanna a hluar phah hle ni a hriat a ni bawk a. A bik takin tunhnaiah Khuh damdawi (cough syrup) te hi dan ang thlapin Dak In (Post Office) kaltlangin Mizoram chhungah a lo lut hnem hle tih hriat a ni a. Hemi chungchanga hmalak dan turte pawh chipchiar taka sawiho a ni.

Mizoram pumah September, 2025 atang khan Ruihhlo Do beihpui hi thlak tan a ni a, Operation Jericho tia hming vuah niin nimin-a thukhawm ah hian Operation Jericho chu a hlawhtlin thu ngaihthlak a ni a, tha thlah lova kal zel tha tih tlan a ni a. Ruihhlo do kawngah hian Mizoram Police leh Excise Department a thawktute chu Central YMA hnuaia Central Anti-Drug Squad (CADS) ten ngawrh takin an thawhpui zel a. Sawrkar lam atang pawhin sawrkar hnathawkte tha tihchak mai bakah tlawmngai pawlte tha tichak zel turin hmalak chhunzawm zel nise tih a ni bawk.