Revenue Minister in Online-a Chhiah Pekna Portal thar landtax.mizoram.gov.in a hawng
Information and Communication Technology (ICT) Department nen tangkawpa siam online portal hawnna puala Directorate of Land Revenue & Settlement Conference Room-a hun hman ah Revenue Minister B. Lalchhanzova chuan a hmuna khawn ngai lova mipuite’n mahnia awlsam zawka chhiah an pe thei tawh tur chu lawmawm a tih thu sawiin, Ram hmasawn leh hnam zahawm ni thei turin mipuiten Chhiah an pek tam a, an pek that a ngai tih a sawi a. Mizote chu mahni kea ding thei (self-reliant) ram ni turin LR&S Department chuan hma a lak tan thu leh, hetiang technology lama hmasawnna hian India ram puma hmasawnna tehna kawngah pawh dinhmun tha zawkah Mizoram chu a chawikang a, State dangte tih dan en ringawt bik lova State dang te’n min entawn ve theih nan hma lak zel a ni chu lawmawm a tih thu a sawi bawk.
He hunah hian ICT Department-a Informatics Officer, C. Lalrinfela chuan tuna an hawn tak Online Tax Portal Version 2.0 leh Version 1.0 danglamna lian ber chu Annual Performa hmanga siam vek a ni tawh tih a sawi a, hei hi kum bithliaha mipute tan chhiah pek tur zat felfai taka duanna a nih thu leh he portal hmang hian SMS hmangin Chhiah pek hun leh chhiah pe lo te thinna tur duan a ni a, Bharat Bill Payment System (BBPS) Service awmna mobile app GPay, PhonePe, BHIM, Amazon Pay leh a dangte hmangin Service list atangin Land Tax leh Zoram Chhiah chu Family ID emaw, Ration Card No. hmangin a pek theih tawh dawn a ni.
Land Tax leh Zoram Chhiah pekna atana record pawimawh Ration Card Number leh Phone Number link thar emaw, link that ngaite tan Office kal kher ngai lovin portal hmangin a thehluh theih tawh dawn a. Land Tax pe tur tan Family ID hmanga pek a ngai tawh dawn a, mahni Family ID la hrelo tan portal-ah hian a zawnna dah a ni a. Lawngtlai leh Siaha District tih loh chu District zawng zawng an onboard tawh a, District onboard tawh zawng zawng te chuan online hmangin Land Tax leh Zoram Chhiah an pe thei tawh dawn a ni.
Heng bakah hian thawktu lam tana tangkai tur belh a awm nual bawk a, Annual Proforma behchhan a nih taka vang hian report leh estimate felfai zawk siam kawngah leh chhiah pe tha leh thalo chhinchhiah kawngah thawktute a tichhak thei dawn a. Rate leh Chhiah chawi tur zat thlak (revised) anih pawhin harsatna awm lovin Surveyor leh Manual Fee Collection ti thin tan pawh payment record felfai taka chhinchhiahna belh a ni a. Periodic Patta leh House Pass (Validity neite) chu automatic-in system in zar dar 12:00 pelh chiahin a block nghal zel tawh dawn a, hei bakah hian Land Tax leh Zoram Chhiah Master Record-ah hian tihdanglam (change) awm apiang System hian a chhinchiah zel tawh dawn bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!