Kum 2025-2026 ah HIV kai thar 1732 an awm

Kum kalta 2025-2026 chhung khan Mizoram-ah HIV kai thar mi 1732 hmuhchhuah an ni a, HIV inkaichhawnna langsar ber chu mipat hmeichhiatna hman atangin a ni.
Chhinchhiahna atanga a lan danin nikum chhung khan mipui nawlpui te thisen enfiah atangin HIV kai thar mi 1628 hmuhchhuah a ni a, HIV kaina tam ber hi mipat hmeichhiatna atanga kai an ni a. Nikum 2025-2026 chhung vek khan naupai lai enfiah atangin HIV kai mi 104 hmuh a ni bawk a, heti hian nikum chhunga HIV positive hmuh zawng zawng chu 1732 an ni. Nikum-a HIV hmuh thar te hi mipa 1105 (63.8%) leh hmeichhia 627 (36.2%) te an ni a. HIV positive te kaina tam ber chu mipat hmeichhiatna (sex) atangin a ni a, hemi atanga kai hi mipa 744 leh hmeichhia 474, an vaiin mi 1218 niin hei hi nikum chhunga HIV kai zawng zawng atanga chhutin 74.82% a tling a ni. Heng bakah hian Hriau thianghlim lo inhmantawm vanga HIV kai chu hri kaina langsar ni bawkin mipa 338 leh hmeichhia 31, an vaiin mi 369 chuan an kai a. Hriau thianghlim lo inhmantawm vanga kai hi hri kai zawng zawng atanga chhutin 22.67% an tling a. Nu atanga naupang in a kai 27 (1.66%) awmin kaina chhan hriat loh mi 14 (0.86%) an awm bawk.

HIV kai thar zingah hian nupui/pasal nei lai mi 576 awmin hei hi hri kai hmuh atangin za zela 47.29 a ni a, kawppui nei lem lo mi 542 awmin hei hi za zela 44.50 a ni a, Mawngkawhur mi 79 (6.49%) leh Hmeichhe inzuar (Commercial partner) mi 21 (1.72%) an awm bawk. HIV kai hmuhchhuah thar zinga a tam ber hi thalai, hnathawk thei rual an ni a. HIV hmuhchhuah zingah hian kum 25 atanga 34 inkar an tam ber a, mi 625 hmuh an niin hei hi HIV hmuh thar zawng zawng atanga chhutin 38.39% a tling a. Kum 35 atanga 49 inkar chuan dawtin 508 (31.20%) an ni a, kum 15-24 inkar 332 (20.39), kum 50 chunglam 132 leh kum 14 hnuailam mi 31 te an ni. Mizoram State AIDS Control Society (MSACS) chhinchhiah danin kum 2009-10 atanga 2025-06 inkar chhung khan Mizoram-ah HIV hmuhchhuah mi 28,371 an awm a ni.