Promotional Video tlangzarh

Hmeichhia leh naupang te himna atana Passenger phur Motor zawng zawng-a ‘Panic Button’ vuah chu mipui nawlpui ten an hriatthiam theihna tura inhrilhhriatna tur Video siam thar chu nimin khan Social Welfare, Woman and Child Development Minister Lalrinpuii chuan a Pisa-ah a tlangzarh.
He hunah hian Minister Lalrinpuii chuan Vehicle Location Tracking System Project chu Nirbhaya Case avanga sawrkar laipuiin hmeichhia leh naupangte himna atana hmalakna a nih thu leh sawrkar laipui chuan tha pawh a seng nasa em em tih a sawi a. Panic Button chu mi tam thei ang berin an lo hmelhriat a, a mamawhtu leh hmang tangkai tur ten a hun taka an hman tangkai theuh theih nana promotional video thehdarh kawngah theihtawp chhuah theuh turin a sawm a ni.

He hunah hian Transport Department Director Er. R.Lalrammawia chuan Vehicle Location Tracking System (VLTS) chu Sawrkar laipui-a Ministry of Road Transport and Highways in October 25, 2018-a Order a chhuah zulzui a hmalakna niin, October 2022 atang khan Mizoram sawrkar pawhin hma a lak tan thu a sawi a. Command and Control Center pawh September ni 15, 2023-ah hawn niin August 22, 2023 leh September 23, 2024 khan notitication chhuah a ni a. Hemi ang hian Passenger phur chi motor reng reng Taxi, Maxi Cab, Bus leh Rental-ah te VLT khawl vuah lo leh tinung lo chuan Motor Registration a tihtheih tawh dawn loh a ni. Hei mai bakah hian Motor hluiah pawh, January ni 1, 2019 hnua lei ho chu order chhuah atanga thla 12 chhungin VLT Device an vuah lo emaw, an tinung lo emaw a nih chuan re-registration/permit issuance/fitment a renew theih tawh dawn loh a. Auto Rickshaw leh 2 Wheeler Taxi te erawh chu hei hian a huam ve lo a. Tunah hian Mizoram chhungah Vehicle Location tracking Device activate passenger phur motor hi 2,284 a awm mek a ni.