MUHCS 2.0 ah cheng nuai 700 pechhuak tawh

Health Minister Lalrinpuii’n Mizoram Universal Health Care Scheme (MUHCS) hnuaiah kumin April ni 1 atanga MUHCS Bill pek chhuah tawh zawng zawng chu cheng nuai 700 anih thu sawiin, damlo mi 2615 enkawl an nih tawh thu a sawi.

Health Minister hian Social media kaltlanga MUHCS chungchang a sawina ah he thu hi sawiin, MUHCS 2.0 hnuaiah cheng nuai 700 pek chhuah a nih tawh thu leh April ni 30-ah cheng nuai 300 lai an pekchhuah thu a sawi a, damlo mi 2615 enkawl an ni tawh tih a sawi bawk a ni. Mizoram State Healthcare Society hotute pawhin zawhna chhangin, sawrkar kum kal mekah MUHCS 2.0-ah hian MUHCS kalpuitu damdawi In te hnenah damlo an enkawlna senso rulh nan cheng nuai 700 an pekchhuah tawh thu leh hei hi damlo 2,615 enkawlna senso a nih thu an sawi a; thla hmasa chhung khan damlo enkawlna pawisa hi tum hnih pekchhuah a nih thu an sawi a ni.

Mizoram Healthcare Society hotute chuan damlo bill an dawn reng thu leh a tahtawl tê têin pawisa an pekchhuah zel thu an sawi a, damdawi In te hnena damlo enkawlna senso pe turin an inbuatsaih leh mek thu leh tunkar ah pawh an pekchhuah leh dawn thu an sawi a ni.

TMUHCS 2.0-ah hian pawisa senga inziaklut chhungkua 37,851 an awm tawh a. MUHCS 1.0 ah khan chhungkaw inziaklut 20,213 an awm a, a punna chu chhungkaw 17,638 niin za zela 87.26 zet a ni a. MUHCS 2.0-ah hian inziahluh theih hun hi tun thla ni 15 thleng hawn niin, online hmangin muhcs.mizoram.gov.in-ah inziahluh theih a ni a; sawrkar hnathawkte, pensioner-te leh Golden Card neite chu inziahluh a ngai ve lo thung a ni.