SRDC chu khaw 15 huama din tum a ni

Sialkal Range Development Council (SRDC) chu khaw paruk chauh huam ni lovin khaw 15 huam tura din tum a ni.

Hemi chungchang hi GAD changtu Chief Minister Lalduhoma chuan tunhnai khan sawiin, khaw paruk chauh huam tura ruahmanna siam chhoh a nih lai-in Paite hnam bil pual ni lovin he Development Council a tel duh khaw dangte nen pawt khawmin hnam bil ni lo, Development Council din tum a ni tih a sawi a. Hemi chungchang hi Assembly Select Committee chuan tunhnai khan a ngaihtuah tawh a, a buaipuitu lam pawhin an remti tawh ni a hriat a ni. 

Sialkal Range Development Council dinna atan hian Sialkal Range Development Council Bill, 2026 chu Chief Minister Lalduhoma hian kumin February ni 23 khan Assembly-ah a lo pulut tawh a. Sawiho a nih hnuah dodaltu an awm avangin en that leh turin Select Committee kuta dah turin thutlukna siam a ni ta a. Hnam bik pual ni lovin he lai Bial-a cheng eng hnam pawh hma an sawn theihna turin ruahmanna kalpui a ni dawn a. Chief Minister chuan a tira tel ve duh lo khaw engemawzatin Sinlung Hills Council huamchhunga tel ve an duh tawh thu a tarlang bawk.