Mizoram puala din NCC Group Headquarters Office chu nimin khan Aizawl-ah hawn a ni t

Mizoram puala din NCC Group Headquarters Office thar chu nimin khan National Cadet Corps (NCC) Director General Lt. Gen Virendra Vats chuan Level 2, New High Court Parking Complex, MINECO-ah a hawng a, Mizoram sawrkar-ah mi pawimawh hrang hrang ten he hun hi an zawm a ni.

Mizoram puala din NCC Group Headquarters Office thar hi NCC Director General Lt. Gen Virendra Vats chuan biakhmuhtheihna (Video Conferencing) hmanga hawngin Mizoram sawrkar chungah te, Brig. GS. Arora chungah leh NCC Mizoram Group Cadet-te chungah lawmthu a sawi a. Hmasawnna ruhrel (infrastructure) tha hian khawiah pawh hmalatute leh ram hruaitute hnathawh a tih chak theih thu sawiin, Mizoram NCC Group pawhin chutiang hmasawnna ruhrel tha a nei ve ta chu lawmawm a tih thu leh Mizoram leh hmarchhak Bial pumpui tana hmasawnna thlentu tur a nih thu a sawi a. “Hmarchhak Bial kan ngaihthah a nih chuan khawchhak lam kan thlîr thei lovang,” tiin Mizoram NCC Group Cadet-te chu NCC programme chu mi tin huapzo zâwk, thalai tam zâwk telna a nih theih nan leh hnam hrang hrang lungrual taka an tel tlan theihna a siam turin a fuih a ni.

Lt. Gen Virendra Vats chuan hun inthlak danglam zêlah hian Hardware, Software, leh Manpower te tha taka an kaltlan a pawimawh thu sawiin, tunah chuan Mizoram NCC Group hian Hardware lam a nei tha tawh a, a dawt lehah chuan Software leh Manpower hmasawnna lam hawi a hun tawh thu a sawi a. Mizoram NCC Group-te hnenah a duhsakna hlanin, a hma thei ang bera Mizoram tlawh ngei a chak thu a sawi bawk.

Mizoram puala NCC Group Headquarters Office thar hawnna hunah hian NCC Mizoram Group Commander, Brig. GS. Arora chuan Aizawl-a NCC Group HQ te Instagram leh X account a tlangzarh nghal a. Brig. GS. Arora chuan hei hi a bul tanna chauh a la nih thu leh Mizoram-ah tih tur tam tak an la neih thu a sawi a. Hemi bakah hian an thil tihna apiangah theihtawp an chhuah zel dawn tih a tiam bawk a. NCC Alumni-te, Cadet titha (Achiever cadets) te leh North Eastern Region-a lawmman dawngtute chawimawina hlan nghal a ni bawk.

National Cadet Corps (NCC) hi NCC Act, 1948 hmangin July ni 15, 1948 khan India ramah din niin, an Motto chu ‘Unity & Discipline’ (Inpumkhatna leh Inthununna) tih a ni a; naupangte’n zirlai an nih lai atanga mahni inthunun theihna an neih theihna tur te, hmahruai kawngah leh ram leh khawtlang tana mi tangkai leh chhawrtlak an nih theihna turte a inchher-hriamna niin, School leh College hrang hrangah te NCC Unit din a ni a. High School leh Higher Secondary School zirlai bakah College kal lai Mipa leh Hmeichhia, a duh apiangte tan zawm theih a ni bawk.

Mizoram-ah chuan NCC hi kum 1964 khan din a ni a, tun dinhmunah Batallion 4 awmin Aizawl-ah Battalion pathum - 20 Mizoram Bn. NCC; 1 Mizoram Bn. NCC leh 1 Mizoram Air Squadron NCC te awm mekin, Lunglei-ah Battalion pakhat, 2 Mizoram Bn. NCC a awm bawk a. Heng Batallion hrang hrangte hi Silchar Headquarters hnuaiah an awm thin a; amaherawhchu NCC tihlenna (expansion) Plan hnuaiah Mizoram sawrkar chuan January ni 18, 2024 khan Aizawl-ah NCC Group HQ din turin Sanction Letter a tichhuak a ni.

Hemi atan hian hmalak chhoh nghal niin Group HQ din hna hi July 2025 khan tan a ni a; HQ-a thawk tur Officer-te chuan July 2026 atanga zawmin January 29, 2026 khan Chief Minister Lalduhoma chuan Group HQ Flag a tlangzarh a, a tuk January ni 30, 2026 khan Governor General (Dr) Vijay Kumar Singh chuan Aizawl-a NCC Group HQ hi a hawng nghal a ni.