Mizoram-ah Special Intensive Revision (SIR) neiin Electoral Roll siamthat hna thawh a ni dawn

Election Commission of India chuan a bik taka Electoral Roll ennawnna, Special Intensive Revision (SIR) thawh thumna neih a nih tur thu nimin khan puangin Mizoram tiamin State 16 leh Union Territory 3-ah SIR hi kalpui a ni dawn a, July 1, 2026-a kum 18 tling chin te chu Electoral Roll-ah thun tur an ni ang.
Chief Electoral Officer (CEO) Mizoram Dr. Lalrozama IAS chuan nimin khan Aizawl Press Club-ah thuthar thehdarhtute kawmin Mizoram-a Special Intensive Revision (SIR) kalpui a nih tur thu hi a puang a, Mizoram-a Intensive Revision neih hnuhnung ber chu kum 2005-ah niin kum 20 a liam hnuah 'Special Intensive Revision' neih a nih tur thu puangin, “Hei hi kalphung pangngaia Electoral Roll ennawn thin ang ni lovin, tun tuma Election Commission of India in ti tura min tih hi chu a dan a dang a. Electoral Roll revision hi a aia thuk zawk leh changtlung zawka neih tur a ni a, BLO ten Enumeration Form nen In (household) tin an tlawh dawn a, Roll thar hlak siam tur a nih avangin voter zawng zawng ten kan ngaih pawimawh hle a tul a ni,” a ti.

Special Intensive Revision (SIR) atan hian Mizoram-ah pawh hmalakna kalpui nghal a ni a, chawlhkar tharah khian District tina DEO ten Enumeration Form an print anga, hei hi ni 3 chhunga peihfel tura beisei niin he Enumeration Form nen hian May 30 - June 28, 2026 chhungin BLO te chu In (household) tinah vawi thum aia tlem lo an kal dawn a. Hemi hun chhung hian In lama biak theiha lo awm hram turin CEO chuan mipuite a ngen a. BLO te hian an Bial theuha In tinah Enumeration Form hi an sem anga, In neitute hnenah thil pawimawh an hrilhfiah anga, dahkhah (fill up) tur te an zawh hnuah BLO te vek hian an khawn leh vek ang a. Ennumeration Form submit lo te chu Draft Roll-ah an chuang dawn lo a. Enumeration Form hi copy 2 sem a ni dawn a, pakhat chu Voter ta tur niin BLO in a sign hnan anga, pakhat zawk erawh BLO ta tur a ni thung ang.

SIR-ah hian kum 2005-a Mizorama Intensive Revision lo neih tawha Electoral Roll leh kum 2025 Electoral Roll chu enmil a ni dawn a, BLO te chuan kum 2005 Roll-a awm tawh leh la awm lo te endikin, kum 2005 Electoral Roll-a chuangte chu an fate leh an thlahte awm leh awm loh nen an enmil hnuah thlunzawm (map) a ni a. Kum 2005 Electoral Roll-ah hian voter 5,59,123 awmin kum 2025 Electoral Roll-ah hian voter 8,75,004 an awm thung a. Kum 2005 leh 2025 Electoral Roll enmila, percentage of self and progeny (E-Roll a hming chuang te leh an thlahte) mapping tihhlawhtlin zat chu 80.37% a ni.

Special Intensive Revision (SIR)-ah hian July 1, 2026 chu qualifying date-ah hman tur niin July 1, 2026-a kum 18 tling hman te chu Electoral Roll-ah thun an ni dawn a. May 30 - June 28, 2026 chhungin BLO ten In tin an tlawh anga. Draft Electoral Roll hi July 5, 2026-ah tlangzarh a ni ang. Draft Roll hi CEO website, ERO Office, Village Council leh Local Council Office-ah tarchhuah a ni dawn a, a duh apiang tan en theih a ni ang. Lungawi lohna nei ten claims & objection an thehluh hun hi July 5 atanga August 4, 2026 chhung hawngin heng Claims and Objections chinfel hun chhung hi July ni 5 atanga September 2, 2026 a ni a. Final Electoral Roll hi September 6, 2026 ah tlangzarh a ni ang.

Langtlang leh rintlaka Electoral Roll siam a nih theih nan Political Party tin te chu Block Level Agent (BLA) inruat tura tih an ni a. Tun thlengin BJP in 294, INC in 1045, MNF in 868 leh ZPM in 1223, an vaiin BLA 3430 ruat an ni tawh a, AAP ten la ruat ve lo thung a. Mizoram CEO Dr. Lalrozama chuan mobile app -ECINET download turin mi tinte ngenin, he app hmang hian kum 2005 Intensive Revision-ah voter ten an hming a chuan leh chuan loh an en thei a ni.