Kan ram leh hnam nghet taka a din zel theih nan kawng hrang hrangah kan fimkhur a tul thu sawi

Chief Minister Lalduhoma chuan kan ram leh hnam hi nghet taka a din zel theih nan kawng hrang hrangah kan fimkhur a tul thu a sawi.
Zirtawpni kalta zan-a Sub-Hqrs. YMA Serchhip Inkhawmpui Thenzawl Auditorium-a neih a hmanpuina ah Bialtu MLA leh Chief Minister Lalduhoma chuan Serchhip Sub-Hqrs. YMA huamchhung chu hmalai Mizo Lal langsar tak tak ten an lo thut tawh a ni tih sawiin, “Keini an thlahte, Serchhip Sub-Hqrs. chhunga chengte tan chuan Mizoram hmangaih hi kan tihmakmawh, kan pi leh pute atanga kan chhawm a ni a. Kan bansan a thiang ve lo,” a ti a. Amaherawh chu, kan ral do erawh an inang tawh lo tih kan hriat a ngai tih sawiin, “Ram inrelbawlna fel tak hnuaia kan khawsak tawh avangin ralthuam leka indo a ngai tawh lova. Ram leh hnam humhalh tura kan tih turte pawh an danglam tawh a ni,” a ti. Chief Minister chuan kan ram leh hnam hi nghet taka a din zel theih nan kan fimkhur a ngaihna kawng hrang hrang sawiin, ruihhlo laka kan fihlim a tul thu te; Sawrkar hna lian leh ang thawk tura National Level Competitive Exam paltlang thei tura tanlak a tul thu te; Kan society min phuarkhawmtu Zo nun ze mawi tak takte a taka nunpui a tul thu te; Hursualna leh hmeichhia mahni inzawrhna laka kan fihlim a tul thu leh Chhungkaw tha din turin nula leh tlangvalte inbuatsaih a tul thu te a sawi a ni.

Bialtu MLA chuan Serchhip District tana sawrkar hmalakna thenkhat te pawh tarlangin, Thenzawl Peace City Project leh SASCI Green Field City ruahmanna kalpui mek niin Thenzawl-ah Rel a luh theihna tura hmalak mek a nih thu te, Thenzawl-ah hian PWD Division hawn a nih thu te; Biate-ah PWD Sub-Division thar hawngin Artahkawn leh Biate inkar kawng, Tuipui Lei leh kawngpui dangte siam that hna thawh a nih dawn thu te; Sialhawk-ah Multipurpose Hall sak tum a nih thu te; Khankawn to Lungva zau Phase 2, km 5 a thui laiin Baktawng – Hmawngkawn – Chawilung kawng an siam that dawn thu te; East Lungdar-ah Artificial Turf phah a nih dawn thu te; N. Vanlaiphai Augmentation of Water Supply Scheme chu kum hnih zet thawh chhunzawm lohin a awm hnuah thawk chhunzawmin Trial Run an neih mek thu bakah Thentlang to Lungpho, (Buanhmun to Ramrikawn) kawng siam tum niin Bungtlang to Matvate pawh PCC-a siam a nih dawn thu a sawi a. Mat lui chu Multipurpose Dam tura khuah dan an dap mek thu leh Brahmaputra Board ten an umzui mek thu te pawh a sawi bawk a ni.