Sub-Hqrs. YMA Serchhip Inkhawmpui in an hmalakna tur hrang hrangte an rel
Kum khat dan-a neih thin Sub-Hqrs. YMA Serchhip Inkhawmpui vawi 8-na hi Ningani zan khan Thenzawl Auditorium-ah neih tan niin Palai lawmna leh Report hrang hrang ngaihthlakna hun hman a ni a, he huna tarlan a nih danin Sub-Hqrs. YMA Serchhip hi June 18, 2008 khan din niin an huamchhungah hian Group YMA pathum (3) awmin YMA Branch 74 a awm mek a, heng YMA Branch 74 zinga 46 te hi Group YMA huamchhunga awm niin Town chhungah YMA Branch 21 leh Sub-Hqrs. YMA in direct-a a awp Branch 7 a awm mek a, tun dinhmun ah YMA Member 37,178 an awm mek a ni.
He hunah hian chawimawina chi hrang hrang semchhuah niin Sub-Hqrs. YMA Serchhip huamchhunga YMA Chanchinbu thaah lawmman pakhatna chu Senhri (Sialhau Branch)-in dawngin Zonunmawi (Serchhip Chhim Veng Branch) in pahnihna leh YMA Palai (S. Kawnpui North Branch) in pathumna te an dawng a, YMA Branch zinga ‘Ruihhlo Do’ bawhzui tha lawmman pakhatna chu Serchhip Chanmari Branch in dawngin Serchhip Vengchung Branch in lawmman pathumna leh Thenzawl Field Veng Branch in lawmman pathumna an dawng a, Sub-Hqrs. YMA huamchhunga fa paruk (6) aia tam nei te chawimawina an hlan thin pawh mi 11 te hnenah hlan leh a ni bawk.
Zirtawpni khan Sub-Hqrs. YMA Inkhawmpui Rorelna neih niin YMA khawih Agenda 5 an rel zingah ‘Kan District chhung luidunga lungte hi humhalh turin Sub-Hqrs. YMA-in hma la rawh se’ tih chu pawmin ‘District Hospital sak lai mek hi chak zawka hmalak a nih theih nan Sub-Hqrs. YMA-in hma la rawh se,’ tih te, ‘Khawhar In-ah khawhar hla (Van ngaih hla) leh Pathian pawlna hla bak sa tam lo tura inzirtirna neih ni rawh se’ tih te, ‘Sub-Hqrs. YMA Serchhip buatsaihin tuia chettlat leh chhanchhuahna lam inzirtirna neih ni rawh se,’ tih bakah ‘YMA Chhang pualin Mizo Infiamna leh Hnam Lâm Kûtpui neih ni leh rawh se’ tih te chu pawm a ni bawk.
Sawrkar khawih an rel zingah ‘Serchhip khawpui chhung hmun remchang laiah Serchhip District thingtlang lam atanga School rawn lûtte tan Boys & Girls Hostel lian tak sak a nih theih nan Sawrkar-ah thlen ni rawh se’ tih te, ‘State Integrated Rehabilitation & Care Centre, Mental Health and Disability Care din turin sawrkarah thlen ni rawh se,’ tih leh District Hospital, Serchhip-ah Doctor tha kan neih belh theih nan sawrkar ah thlen ni rawh se’ tih te rel a ni a, kum 2026-2027 Budget atan Rs. 16,07,550/- pawm a ni bawk.
Tun tuma Sub-Hqrs. YMA Inkhawmpui ah hian kum 2026-2028 chhunga hruaitu tur thlanna nei nghalin President-ah PC. Vanlalluna (Chhiah-tlang Zotuithiang Branch); Vice President-ah C. Lalrammuana (Serchhip Field Veng Branch); Secretary-ah Dr. Laldinpuia (Serchhip Hmar Veng Branch); Asst. Secretary-ah Zonunsanga Kawlni (Serchhip Chanmari Branch); Treasurer-ah Ramdinmawia Ralte (New Serchhip Venglai Branch) leh Fin. Secretary-ah H. Lalbiakhlua (Ser-chhip Hmar Veng Branch-te thlan an ni bawk.
He Inkhawmpui hi Serchhip Bialtu MLA leh Chief Minister Lalduhoma chuan Zirtawpni zan khan khuallian niin a hmanpui a, he hunah hian Central YMA Fin. Secretary MS. Ralte chuan YMA Kumpuan, ‘Ruihhlo Do’ tih hmangin thu a sawi bawk a ni. Tun tum YMA Inkhawmpui ah hian an member boral mi 2341 te sunna hun hman a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!