Jr. Grade of MAH&VS hna lakna a bul atanga tan that leh phut

Mizo Zirlai Pawl (MZP) chuan Mizoram Public Service Commission (MPSC) buatsaih Jr. Grade of MAH&VS Direct Recruitment chungchangah thil fel lo a awm ngei nia an hriat thu sawiin, MPSC thuneitute chu an thil tih dik tawk lo ah mawhphurhna la ngam tur leh he hna lakna kaihhnawih thil zawng zawng pawh tun thla (May) ni 29 hma ngeia a bul atanga tan that a nih theih nana hma la tura an phut thu an sawi.

Inrinni-a Aizawl Press Club-a thuthar thehdarhtute an kawmna ah MZP President C. Lalremruata chuan, AH&Vety Department atana MPSC-in hna a lak tur chungchangah hian thla hmasa, April ni 27 khan MPSC chuan Written result a tichhuak a, post 4 lak tur a nih laiin Written Result chhuakah mi 3 chauh tih tlin an ni a. He hna diltu zingah MPSC-in nikum October ni 24-a Valid List a tihchhuahah mi 101 an awm a, chung zinga mi 74 te chuan Written Exam hi an hmachhawn niin a sawi a ni.

MZP President chuan thla hmasa ni 7-a Written Result chhuakah mi 3 chauh an tling chu mak tiin MPSC lam an zawhfiah thu sawiin, Written Exam hmachhawn zinga mi 71-ten Written Exam an paltlang loh chhan chu MPSC Online form/portal-ah Veterinary Council Registration an upload loh vang niin MPSC lam chuan an sawi a; MZP-in a zirchianna-ah mi 71-te hnen atangin MPSC form, Online portal an fillup lai hian Veterinary Council Registration Certificate upload na tur option/slot a awm loh bakah online form-ah hian thlan tur dah a ni lo niin an sawi bawk.