H&TE Minister in Lunglei-a zirna hmun pawimaw te a tlawh

Higher & Technical Education (H&TE) Minister Dr. Vanlalthlana chuan nimin khan Lunglei Pukpui-a Mizoram Engineering College (MEC) chei that mek te, Serkawn Melte-a Mizoram State University (MZSU) hmunpui tur leh Govt. J. Buana College (GJBC) Campus hmun tur ruahman bakah Theiriat-a Mizoram Polytechnic Lunglei (MPL) hmunhma te tlawhin an dinhmun a enfiah.

Heng hmun hrang hrang a tlawhna ah hian H&TE Minister chuan Lunglei Pukpui-a Mizoram Engineering College (MEC) chu a building sak pum nan cheng vbc. 26 sen a nih thu sawiin, tuna a taka zirna kalpui thei tura Mizoram sawrkarin a chei thatnaah hian a sakna aia tam sum sen a nih tawh thu a sawi a. Luah theih tura chei that ngai – kawng siam, eng leh tui pekna, a ruhrel thawm that, a chung far leh tui put tihphui, kawngkhar, tukverh leh darthlalang thlak, rawng hnawih thar leh hmanraw hrang hrang lei tur ruahmanah 60% vel chu zawh fel a nih tawh thu a sawi bawk.

Mizoram Engineering College-ah hian building ding lai 8 - Academic Block, Administrative Block, Workshop/Laboratory, Library, Boys Hostel, Girls Hostel, Cafeteria leh Students Common Room te a awm a. Sawrkarin a thawm thatna tur cheng vbc. 28.03 a ruahman chu kawng siamna atan cheng nuai 1,012 (MPWD kutah), Tui pekna leh dahkhawlna (water supply & storage) atan cheng nuai 249.44 (PHED kutah), Eng pekna leh transformer bunna atan cheng nuai 106.36 (P&ED kutah) leh H&TE kutah Campus tihchangtlunna te, hmanrua leh bungraw hrang hrang leina atan cheng nuai 1,435.39 dah a ni a. Tun dinhmunah P&ED leh PHED te hna hi zo tawhin, PWD hna hi 40% an zo tawh a. H&TE atanga Campus chei that hna (physical work) hi 40% vel zawh tawh niin, hmanrua leh bungrua eng emaw zat chah thlen a ni tawh bawk.

MPL hi kum 1981 khan Civil Engineering nen bul tan niin, tunah hian Department 4 – Civil Engineering, Electrical Engineering, Mechanical Engineering leh Computer Science & Engineering te a awm tawh a. MPL atanga zir chhuak 80–90% chuan hna an hmu tawh niin thawktute chuan an sawi bawk.