Eirawngbawlna Gas renchem kawngah tan ngai ti

Mizoram RGGLV Distributor Association President Vanlalvuta Chinzah chuan eirawngbawlna gas renchem kawngah tan lak chhoh zel a ngai tih a sawi.

Tunhnaia sawrkar laipuiin Commercial Gas bur man a tihsan chungchangah Vanlalvuta Chinzah chuan eirawngbawlna gas bur lian chi, Commercial Cylinder chu thla hmasa ni 1-ah Rs. 2,573 man niin tun thla ni 1 atangin Rs. 3,567 man a nih thu a sawi a. Bur khat man chu Rs. 994 in a to ta tih sawiin, heti hian kg 1 zelah Rs. 52.03 in a to belh a. Hei hi a chhan bulpui ber chu Iran leh USA inkara buaina avanga khawvel pumpuia oil leh gas supply buai vang a ni tih a sawi a. Buaina chinfel a nih loh avangin gas a harsa chho tih sawiin, chuti chung chuan sawrkarin theihtawp a chhuah thu leh a bur lian man chauh ti toin eirawngbawlna gas bur pangngai, Domestic Cylinder man bik chu mitin mamawh a nih avangin a la ti to lo tih a sawi a ni. 

Vanlalvuta chuan Mizoram-a eirawngbawlna gas supply chu a harsa tan tawh nia sawiin, mahni hminga connection nei lo, mahni In-a hmang ve tho si te'n a hma chuan Gas an la ve thei mai thin a, tunah chuan an la thei tawh lo a, an buai hle tawh tih a sawi a. Eirawngbawlna gas chu In tinin bur 2 aia tam bur an kawl tlangpui avangin khawlkhawmin engemaw chen a la veng ni a hriat a nih thu leh heng khawlkhawm sa te hi mipuiten an hmang zo tan tih sawiin, tun ang renga a kal chuan May thla tawp lamah chuan mipuite an buai chhoh mai a rinawm tih a sawi a. Tunah hian eirawng-bawlna gas supply chu khaihlak angin langlo mahse a tak takah chuan a muang chho hle niin a sawi bawk.