Education Minister in ‘UPSC Grooming’ a hawng

All India Service (AIS) leh Central Service-a Mizote kan luh theih nan inbuatsaihna tura Mizoram sawrkarin a buatsaih ‘UPSC Grooming’ chu niminpiah khan School Education Minister Dr. Vanlalthlana chuan a Pisa-ah a hawng.

Hemi puala hun hman ah hian Education Minister Dr. Vanlalthlana chuan Central lam dawra Mizo hmel hmuh tur an awm mang lo chu a khaw-harthlak thu sawiin, “Kan ram thlalaite hian India ram inelna sang ber hmachhawn tur hian kan thei a ni,” a ti a. Sawrkar hna sang vuantute, ram hmangaih si hlawk zia sawiin, “Minister te chu a fawng vuantu nimah ila, a nihna takah chuan kan khawlpui chu kan sawrkar mithiamte hi an ni,” a ti a. He scheme hi sawrkarin an ngaih-pawimawh thu leh tihhlawhtlin ngei a tum thu a sawi a. Hemi tana hma lo la tu zawng zawng MBSE hotute, Mizoram Educational Reform Committee (MERC) te chungah lawmthu a sawi a ni.

UPSC Grooming hi HSLC Examination 2025-a Total Mark 405 hmu chin tan dil theih a ni a. Heng mite hian MBSE buatsaihna hnuaia Written Exam leh Personal Interview te an neih leh vek hnuin mi 10 thlanchhuah an ni. Mizoram Coaching Centre hrang hrangte proposal thehluh zingah hma lo la turin MS Academy, Khatla chu thlan a ni a, he Scheme hi kum tin tih chhoh tum niin thlan chhuahte hi kum 5 chhung tuaihriam (Grooming) an ni ang a. UPSC exam tura naupanlai atanga rilru leh taksa lo insawizawina scheme a ni.

Niminpiah a he hun hman ah hian MERC Member Dr. Rohmingmawii chuan he Scheme hi naupanlai atanga Catch them Young ang kha a ni tih sawiin, hmalatu Minister leh a thawktu MBSE te chungah lawmthu a sawi a. MBSE Chairman, JH. Zoremthanga pawhin uluk taka naupang an thlan dan te a tlangpuiin a report bawk.