Chhungkua atanga bul tan that kan mamawh - CM

Chief Minister Lalduhoma chuan, “Mizoram in ruihhlo vangin harsatna a tawk a, a mamawh ber nia lang chu chhungkua atanga bultan that a ni,” a ti.

Synod Prison Ministry chuan Inrinni khan Aizawl Armed Veng Presbyterian Kohhran Hall-ah Jail-a táng thin chhuak tawhte puala Pathian thu-a inpâwlhona inkhawm an buatsaih a; he hun hi Chief Minister Lalduhoma chuan hmanpuiin Synod Prison Ministry-in Mizorama Jail 10-a tángte a zirchianna atangin Mizoramin a mamawh chu chhungkaw din thar a nih thu leh hemi tur hian ngaihtuahna sen nasat a tul thu a sawi a. Chhungkaw inkawmkhawmna a tam thei ang ber nei a, harsatna leh vei zawngte inhrilhtawnna hun buatsaih tam turin chhungkaw tin a chah a; “Kristian chhungkua tih hi engnge a nih a, eng atanga teh tur nge tih hi ngaihtuah nawn a tul hle,” a ti a. Mizoram chu India rama nupa inthen tam berna a nih avangin hetiang chhungkua atang chuan tu leh fate tha taka enkawl seilen a harsa dawn tih a sawi bawk.

Chief Minister chuan zirchianna atangin Jail tang chhuakten an mamawh nia lang chu hnathawh tur a nih thu a sawi bawk a, sawrkar chuan Hulhliap Short Stay Centre atanga chhuakte tan thiamthil zirna skills Training an buatsaih thu leh tunah hian Synod kutah Saethawn-a Jordan Centre chu hlan niin, hetah hian thiamthil zirna pawh kalpui a nih dawn thu a sawi bawk.

Ex-Prison Inmates Follow Up Programme hi Jail-a táng tawh thin te'n nun kawng dik an zawh zel theihna tura inûm zuina niin, kum khatah vawi hnih buatsaih thin a ni a; Synod Prison Ministry hian kum 2023 atang khan a buatsaih tan a, tun hi an buatsaih vawi 7-na leh kumin-a an buatsaih vawi khatna a ni a. Ex-Prison Inmates Follow-up Programme-ah hian Pathian faka zaihona hun hman a ni a, Chawhnu lamah Jail-a tâng thin chhuak tawhte pualin an rilru-a awmte leh Testimony sawi chhuahna hun hman a nih bakah Jail atanga chhuak zinga kutthemthiamte thilsiam chi hrang hrang phochhuah a ni.