Chak zawka Aadhaar Enrollment kalpui dan tur sawiho

Nimin khan Serchhip-ah chak zawka Aadhaar Enrollment kalpui a nih theih dan tur ngaihtuahin District Level Aadhaar Monitoring Committee (DLAMC) thutkhawm neih a ni.
He thutkhawm Serchhip DC Meeting Hall-a neih hi Committee Chairman leh Bawrhsap Paul L. Khuma chuan kaihruaiin UIDAI Regional Office, Guwahati-a Assistant Manager Chinmoy Kakatia chuan Mizoram pum-a Aadhaar enrollment dinhmun tlangpui tarlangin, Mizoram Projected Population 14,16,000-ah 92.4% te'n Aadhaar an neih tawh thu a sawi a. UIDAI hmalakna thar hrang hrangte tarlangin, tunhnaiah mipui tana hman nuam leh awlsam zawk tur Aadhaar Application thar siam a nih thu leh naupangte'n kum 5 leh kum 15 an tlinin Mandatory Biometric Update (MBU) an tih ngei ngei a ngaih thute a sawi bawk.

Nimin-a thutkhawm ah hian Serchhip District chhunga chak zawka Aadhaar enrolment kalpui dan tur hrang hrangte sawiho a ni a. District Nodal Officer hmalakna tur te, Aadhaar enrolment khawl leh System-a buaina (technical issues) awm theite chinfel zung zung a nih dan turte leh Operator indaihlohna leh harsatna dang awm theite, rang taka sutkian a nih theih dan turte sawiho a ni bawk. District Level Aadhaar Monitoring Committee thutkhawmah hian Serchhip Superintendent of Police Gavit Gogna IPS bakah sawrkar department hotute - Health, Education, Lead Bank leh Serchhip District chhunga Aadhaar Operator-te an tel a ni.