Accessible India Campaign hnuaiah Pisa te enfiah a ni

Persons with Disabilities (PwD) Commissioner Vanlaldiki Sailo kaihhruai Access Audit Team-te chuan Zirtawpni khan Serchhip-a sawrkar Pisa leh hmun pawimawh te tlawhin rualbanlo (vohbik) te tana awlsam zawka luh chhuah theihna siam dan enfiahin Access Audit an nei.
Heng Audit Team te hian Serchhip DC Office, District Hospital, Govt. Serchhip College, Shalom Special School leh Govt. Serchhip Higher Secondary School-te tlawhin PwD Commissioner Vanlaldiki Sailo chuan Serchhip-a hmun pawimawhah te vohbikte tan hmunhma nuam tak siam a ni chu lawmawm a tih thu a sawi a, abikin Serchhip District Hospital leh Govt. Serchhip College te chu vohbikte tana hmun-hma buatsaih kawngah an fakawm a tih thu a sawi a. Serchhip District Hospital chu District Hospital dangte tan pawh entawntlak a tih thu a sawi bawk.

PwD Commissioner chuan ram changkang apiangah vohbikte an ngaihsak zual thu sawiin, “Pian-phunga rualbanlote’n pangngai taka nun an hman ve theih nan, a tulna apiangah kan tanpui an ngai a ni,” a ti a. Sawrkar laipui duh dan angin, sawrkar Pisa-ah te, zirna In-ah te, Biak In leh vantlang mipui punkhawmna hmunahte rualbanlote (vohbikte) tan hmunhma nuam (accessible environment) kan buatsaih zel a tul hle tih sawiin, Wheelchair hman ngaihna hmun te, mitdelte tana braille tarna hmun siam dan te, mipui punkhawmna vantlang building hrang hranga an kalvelna tur hmunhma buatsaih dan tur ruahmanna (drawing) te a sem nghal bawk.

India ram pumpuiah Access Audit hi chak taka kalpui mek niin Mizoram-ah pawh District 9-ah he programme hi kalpui tawh niin Mizoram pumpuiah endikna hi neih chhuah vek tum a ni a. Mizoram-ah hian Office of the Commissioner, Persons with Disabilities hmalaknain February 21, 2025 atang khan 'Access Audit' hi neih tan niin Serchhip-a Access Audit-ah hian Department hrang hranga thawktu ten an lo tawiawm a ni.