ZPM Thalai in MNYF President an sawm; MNYF President in an sawmna a pawm thu a sawi

ZPM Thalai General Hqrs. chuan Aizawl Brigade Field-a AMC Playground enho puiah MNYF President Robert Romawia Royte chu an sawm a, MNYF President hian an sawmna hi a pawmpui thu leh hemi zawh hian New Delhi-a Mizoram tana sum dah SASCI sum lapse dan enho puiah a sawm let bawk.

ZPM Thalai President Jeje Lalpekhlua hova nimin-a ZPM Thalai OB Meeting chuan thuchhuah siamin, tunhnaia MNYF President Robert Romawia Royte-in Press Conference nei-a AMC Playground Brigade Field-ah sum hmanna dik lo a awm lo anga a sawina chu Veng mipuite leh thalai infiammite zahlohna ah an ngaih thu sawiin, Robert Romawia Royte chu a hman hun leh ni te ZPM Thalai hriattir a, ama ho ngei a Bridage Field siam dan en ho puiah an sawm a ni.

Hemi chungchanga Akashvani News Aizawl zawhna chhangin MNYF President Robert Romawia Royte, Hachhek Bialtu MLA chuan ZPM Thalaiten thutak taka an sawm a nih chuan a pawm thlap tih a sawi a, chutihrual chuan an en zawh hnuah chaw te ei hovin, New Delhi-a Finance Ministry-a Department of Expenditure-ah Mizoram tana sum dah liau liau, SASCI sum lapse dan chungchang chu chiang zawka an hriat theih nan kalpui turin a sawm a, hei hi Mizoram leh ZPM Thalaite tan hlawkna a nih a rin thu sawiin, Delhi-a zin pui turin a in peih reng tih a sawi a ni.

Inrinni kaltaa thuthar thehdarhtute a kawmna ah MNF Thalai President Robert Romawia Royte chuan AMC-in Bawngkawn Brigade Field a siamna ah thil diklo a awm nia sawi chungchangah thil dik lo a awm nia sawitu in enga tinge action an lak loh a ti a, AMC chu inthlang tur an ni a, miin an rinhlelh theihna atan an sawi mai mai a a ngaih thu a sawi a, Bawngkawn Brigade Field chu Phullem phahna tura sum sanction a ni lo a. Hemi chungchang hi CBI te, ACB te'n chhui se a duh thu sawiin, chhui tir duh si lo a mipui rinhlelh tawk leka sawi chu a puitling lo tih a sawi a. Robert Romawia hian hemi tum hian ZPM sawrkar kum 2 leh tlem chhung lekin SASCI Part-I hnuaiah vawi 2 sum tam tham tak, cheng nuai 34,483 a lapse a tih a sawi bawk a ni.