Kumin-a Sawhthing hralh tura beisei atangin za zela 7.89 chu SCC kaltlangin hralh a ni tawh

Mizoram sawrkarin kumin (2026) February ni 2 atanga May ni 30 inkara Support Price awma kuthnathawktute Sawhthing hralh tura a beisei atangin zaa 7.89 hralh a ni tawh.

Mizoram Agriculture Marketing Board (MAMB) Co-Chairman leh Adviser to Chief Minister, Dr. KC. Lalmalsawmzauva hnen atanga Akashvani News Aizawl thudawn danin, kumin February ni 2 atanga Support Price awma kuthnathawktu ten Sawhthing an hralh theih hun chhung tura ruahmanna kal mekah tun thla, April ni 3 thleng khan Sawhthing hralhna hmun tur bika ruahman Secondary Collection Centre (SCC) 64 zinga SCC 28-ah Sawhthing hi hralh a ni tawh a, heng Sawhthing hralhna SCC te hi Aibawk, Chawngtlai, Cherhlun, Chhingchhip, Farkawn, Hnahlan, Hnahthial-I, Kanghmun, Khawhai, Khawlailung, Khuangleng, Mamit, Mualkawi, Ngopa, North Vanlaiphai, North Mualcheng, Phullen, Ratu, Reiek, Sialhawk, Tawipui North-I, Thingdawl, Thenzawl, Tipa, Tuidam, Tualcheng, West Phaileng leh Vaphai te niin heng atang hian Sawhthing kg 27,32,098 chu Rs. 769,44,342-a hralh a ni tawh a ni.

Mizoram Sawrkar chuan February ni 2, 2026 atang khan Mizoram-a SCC hrang hrang kaltlangin loneitute Sawhthing lei tum mah se sumdawngten kuthnathawktute Sawhthing an leina man hniam ber tura a bituk, Reserve Price chu Rs. 40 atanga 45 inkar a ni a, a san avangin leitu an awm mai lova, February ni 9 khan Reserve Price chu Rs. 30-35 inkarah tihniamin SCC pahnih- Mamit leh Tuidam atangin Sawhthing chu hralhchhuah chauh a ni a. March ni 27 atang khan SCC 28-ah hian sumdawngte chuan Sawhthing chu kg khat Rs. 25 atanga Rs. 29 inkarin an lei mek a, sawrkarin ba awm lova lei tura sumdawngte a tih angin sumdawngte hian an Sawhthing leina man hi kut hnathawktute hnenah an pe vek tawh a, sawrkar erawhin Support Price chu hralh zawh hunah a pe chauh dawn thung a ni.

MAMB-in Support Price awma Sawhthing hralh theih hun tura a bituk chu February ni 2 atanga May ni 30, 2026 thleng a ni a; SCC 64-a Sawhthing awm zat tura tarlan chu quintal 3,46,470 niin tuna sumdawngten an lei tawh zat hi a vaiin quintal 27,320.98 a ni a, hralh tur zat atanga zaa 7.89 chauh a ni.