Chinland Council hruaitu ten ZORO leh MZP an kawm

Tunhnai khan Myanmar Chin State-a sipai dotu pawl hrang hrang inzawmkhawmna, Chinland Council hruaitute leh ZORO leh MZP General Hqrs. hruaitute chu Aizawl-ah an inhmukhawm.

Chinland Council hruaitute leh ZORO leh MZP hruaitute inhmuhkhawmna-ah hian Zohnahthlak te insuihkhawmna thu leh raltlante chungchang an sawi ni a hriat a ni a. Chinland Council Vice Chairman 1, Salai Min Ngyo leh Chinland sawrkar Chief Minister Salai Myo Thet te chuan ZORO leh MZP te chu a hrang ve ve-in an hmu a. ZORO hruaitute nen hian Mizorama raltlan awm mekte enkawl dan chungchang an sawiho bakah Zofate inpumkhatna a chak lehzual na'n leh insuihkhawm (Re-unification) leh nana hmalakna chungchang te khunkhan takin an sawiho a ni. He inkawmna ah hian ZORO hruaitute hi an President R. Sangkawia chuan a ho a ni.

Chinland Council leh Chinland sawrkar hruaitute hian MZP President leh an hruaitute dangte an kawm bawk a. Mizorama raltlante'n chhawmdawlna bakah raltlan zinga zirlaite'n University thlenga an zir theihna tur te an sawipui nia thudawn a ni bawk.