Vairengte leh Sairang inkar-ah kawng siam zawh a tam tawh

National Highways & Infrastructure Development Corporation Limited (NHIDCL) chuan Vairengte leh Sairang inkar kawngpui thawmthat hna thawh mekah hlawm thum (3) chu siam zawh a nih tawh thu an sawi.

Kolasib District chhunga National Highway (NH-306 & NH-06) kawngpui hman lai mek leh 4-Lane kawngpui siam mek te chu Inrinni khan Kolasib Bawrhsap H. Dolianbuaia chuan a hmunah tlawhin a enfiah a. He hunah hian NHIDCL hotute chuan kawng siam hna an thawh chungchang lo hrilhin, kawngpui hman lai mek (Vairengte leh Sairang inkar) thawmthat hna hi hlawm 5-ah then niin hlawm thum (3) te chu siam zawh tawh a nih thu leh hlawm hnih (2)-ah Black Topping thawh hmabak a la awm thu an sawi a. Kawng an siam zawh tawh chin te hi 4-Lane laitu EPC Contractor te hnenah hlan tawh a nih thu an sawi bawk.

Bawrhsap hian Kolasib District chhunga 4-Lane laih mek pawh hmun hrang hrangah tlawh nghalin NHIDCL hotute tarlan danin 4-Lane kawngpui siam tur hi a vaia belhkhawmin km 90-a thui a ni a; km 30 chu kawng awmsa (existing road)-ah siam a ni dawn a, km 60 chu kawng laih thar (by-pass) a ni thung ang. By-pass hi hmun 6-ah a awm dawn a ni. Tuna kawngpui hman lai mek hi km 117 a ni a, he 4-Lane kawngpui hi siam zawh a nih hunah chuan kawng thui zawng hi km 30 zetin a pawt tawi dawn a. Package 7 bik hi hna 20% zawhfel a nih tawh thu an sawi bawk. He kawngpui thar laih mekah hian Lei (bridge) engemawzat dawh a ni dawn a. Lei dawh tur zingah hian a sei ber tur chu Mualkhang ram hnaiah awmin, metre 540 zeta thui tur a ni a, hei hi peihfel a nih hunah chuan Mizoram-a Lei sei ber a ni dawn a ni.