March 1, 2026-a AMC term a tawp hnuah AMC term thar atan naktuk-ah inthlan a ni dawn

Aizawl Municipal Corporation (AMC) Term dinglai a tawp hnuah Term thar atana AMC Coporator thlanna chu naktuk khian neih a ni dawn a, tun thla ni 27-ah Vote tla te hi chhiar a ni ang.

Aizawl Municipal Corporation term hi March ni 1, 2026 khan tawpin Constitution of India, Article 243ZA-in thuneihna a pek leh Section 346 (1) of the Mizoram Municipalities Act, 2007-in mawhphurhna a pek angin State Election Commission, Mizoram chuan General Election to Aizawl Municipal Corporation, 2026 chu April ni 21, 2026 (Thawhlehni) hian a buatsaih dawn a, April ni 27,2026 (Thawhtanni) zing dar 8:00 atangin vote chhiar a ni anga, inthlan kaihhnawih zawng zawng hi April ni 30,2026-ah chuan zawhfel vek tur a ni.

AMC inthlanna hi Ward 19-ah neih tur niin Vote thlakna atan Bharat Electronics Limited siam Electronic Voting Machine (BEL M2 EVM) hman a ni dawn a, BEL hian EVM-te hi an enfiah vek bakah vote chhiar zawh a nih hma chuan an vil reng dawn a. Inthlan lo awm turah hian Polling Station 257 ruahman a ni a, a tul dan zelin Auxiliary Polling Station siam belh a ni ang. AMC inthlan 2026 neih turah hian Ward No. VIII chu Voters tlemna ber a niin vote nei mipa 3670 leh hmeichhia 4305 awmin Voters zawng zawng hi 7975 an ni a. Ward No. VIII hian Veng pathum- Armed Veng, Armed Veng South leh Chite Veng te a huam a. Ward No. XVIII chu voters tamna ber a niin vote nei mipa 8697 leh hmeichhia 10209 awmin Voters zawng zawng chu 18906 an ni a. Ward No. XVIII hian Veng pariat- Tuikhuahtlang, Mission Veng, Model Veng, Salem Veng, Dam Veng, Venghnuai, Thakthing leh ITI Veng te a huam a ni.

State Election Commission, Mizoram chuan C.C. Lalchhuangkima, MCS, Additional Secretary to the Government of Mizoram chu State Level Nodal Officer, Model Code of Conduct atan a ruat a. Election Expenditure atan Malsawmdawngliani, MF&AS, Director, Local Fund Audit & Pension chu a ruat bawk. Candidate pakhatin Ward pakhat ah Rs. 1,00,000/- thlang an hmang thei a ni.

State Election Commission chuan Aizawl Municipal Corporation inthlan neih turah hian kum upa te, damlo natna khirh bik nei Polling Station pan thei lo te leh pianphung a rualbanlo Polling Station pan theilo te tan anmahni In-a vote an thlak theihna tur 'Home Voting' a ruahman a. Home voting hi  April 13, 2026 atanga April ni 16, 2026 ) thleng khan kalpui a niin Home Voting ti tura dilna lut hi 2768 a awm a. Hriat theih chinah Home Voting hmanga vote thlak upa ber chu Nokungi (kum 108), College Veng a ni. Home Voting hi Ningani tlai dar 5:00 khan a tawp a, dilna lut 2,768 zinga mi 2,594-in vote an thlak a. Vote thlak zat hi 93.71% niin, vote thlak lo mi 174 an awm a, heng vote thak lo te hi boral tawh te, damdawi In lama awm te bakah vote thlak leh duh lo te an ni.