Hmeichhia te tana Seat hauhna tur tlang zo ta lo

Lok Sabha leh State Assembly-a hmeichhiate tana seat za zeka 33 (33%) hauhna tura India Danpui Siamthatna tur, Constitution Amendment Bill chu Lok Sabha-ah a tlang zo lo.
India ram Danpui siamthatna tura he Bill pass tur hian Lok Sabha-ah House Member 528 atanga hmun thum-a thena hmun hnih – Member 352 talin an thlawp a ngai a, hetihlai hian Member 298 chauhvin he Bill hi an thlawp avang leh Member 230-in an dodal avangin he Dan hi hman theih a ni dawn ta lova, hemi avang hian tangrual sawrkar NDA hmeichhe MP-te chuan eptute demna lantirin Parliament kawtah lungawilohna an lantir a ni.

Ramchhung-a hmeichhiate tana Lok Sabha leh State Assembly-a Seat hauh sakna tur, Nari Shakti Vandan Adhiniyam hi kum 2026 hnua chhiarpui neiha Bial thar siamthat a nih hnuah chauh hman theih tura tih a ni a, hetiang a nih chuan kum 2029 inthlanpuiah pawh hmeichhia ten he hamthatna hi an la hmang thei dawn lova, chuvangin, rang zawka kalpui a nih theihnan chhiarpui nghak kher lova kum 2029 inthlanpuia hman nghal a nih theih nan he Bill hi thehluh ni mahse a tlang zo ta lo a ni.

Bill buk a nih hnu hian Parliamentary Affairs Minister Kiren Rijiju chuan Bili dang pahnih Lok Sabha leh State Assembly seat tihpunna tur Delimitation Bill, 2026 leh Union Territories Laws (Amendment) Bill, 2026 te chu Constitution (131st Amendment) Bill, 2026 nena inkungkaih anih avangin vote la loin an hnuk kir leh tih a puang bawk a ni.