Tourism Minister in Zan thum riah daih Aizawl khawpuia Tourism programme an duan thu a sawi

Tourism Department changtu Minister Lalnghinglova Hmar chuan Tourism Department leh UD&PA Department hmalakna hnuaiah zan thum riah daih Aizawl khawpuia Tourism programme an duan thu sawiin, Mizoram sawrkar hnuaia Department hrang hrangah danglamna tam tak a thleng mek niin a sawi.

Nimin khan ZPM Party chuan Aizawl-a an Office-ah Chhung Inkhawm neiin he hunah hian ZPM Adviser leh Tourism Department changtu Minister Lalnghinglova Hmar chuan Tourism Department leh UD&PA hmalakna hnuaiah zan thum (3) riah daih Aizawl khawpuia Tourism programme an duang tih sawiin, “Hemi hmang hian Aizawl economy chawikan kan tum a, kan tih theih ngei pawh kan ring,” a ti a. “Sakawrhmuituai, Muthi, Durtlang North, Durtlang, Hangi Lunglen Tlang, Laipuitlang, Lammual, Khawhpawp, Ailawng & Reiek, Sailam, Sialsuk, Hmuifang-te Tourist hipna turin kan chei thar dawn a, pawisa pawh kan dawng tawh fel tawh a ni. Khualzinte an hun tam zawk Aizawl-ah an cham theih chuan sum tam tak an thlauh dawn a, chu chu Aizawl mipui, a bikin sumdawngten an chhawr dawn a, sum lengvak a tam ang a, kan zavaiin kan chhawr dawn a ni,” a ti.

Kum 2023 December 8 atanga chhiarin ZPM sawrkar chuan ni 849 an hmang ta tih pawh Tourism Minister chuan sawiin, “Term khat, kum 5 hi ni 1826 ni ta se 46.45% kan hmang tawh a ni. Term kal mekah ni 977 a la awm a, June 9 hian term zahve kan thleng ang. Heng kum hnih chhung hian inzir chawp chungin, theihtawp kan chhuah a, duhthusam ni lo mahse Pathian zarah hmasawnna hmuh tur tam tak leh danglamna kan hmu tawh a ni,” a ti a. Mizoram sawrkar hnuaia Department hrang hrangah danglamna tam tak a thleng mek tih sawiin, “Aikal tihtawp te, Advertisement chhuah ngeia hna lak te, Smuggler huangtau te nawrchep an ni a, Buhfai buk dik a ni a, Power bill a huna kan pek tak avangin lawmman (Rebate) te kan dawng ta hial,” a ti a, “MUHCS chungchang ah Kohhran pawhin min phurpuite hi a lawmawm takzet a, Aizawl mipuite hian Health Care tha hi an phu reng a ni,” a ti bawk.