Aizawl-ah BJP Foundation Day lawmna neih a ni

BJP Mizoram chuan nimin khan Aizawl-a an Party Office-ah kar thar inhlanna neiin BJP Foundation Day lawmna hun an hmang nghal bawk.

Nimin-a hemi puala hun hman ah hian BJP State Vice President Vanupa Zathang chuan BJP chu kum 46 chauh a ni thu leh thalai tak a nih thu sawiin, “Chuvangin thalai ta a tih theih hial a ni,” a ti a. “BJP lo dinchhuah dan ngaihtuah hian a dintute khan India ram an hmangaih zia a hriat theih a, BJP hming a putna tura kawng sâttute hi an fakawm hle a ni. Kum 1952 atanga rawn inmung chhovin, kum 1980-ah Bharatiya Janata Party (BJP) ‘India Mipui Pawl’ tih a lo ni ta a, Central-a BJP lo lian zel tur chu Congress Party-in an hmuh lawk avangin kawng hrang hrangin an do a, Mizoram ah pawh kan insawithaih nasa a, Congress Party-te'n an sawisel nasat avangin BJP hming awmzia kan hriat hma hauhvin, kan lo hlau ringawt tawh mai thin a ni,” a ti.

BJP hruaitu ah hian Ram hmangaih avanga mahni In leh lo te, nupui fanau te leh mahni chhungte aia ram hmangaih thlan vanga inpe hruaitu an nih hlawm avangin BJP kaihhruai Sawrkar a pian hnuah Development nasa takin India ram ah a thleng tih pawh BJP Vice President chuan a sawi a, “Tunah phei chuan Pu Modi-a kaihhruai sawrkar term 3-na kal mekin kawng engkimah khawvel mit fûkna kan lo ni ve thei ta a ni,” a ti bawk.

Nimin-a Aizawl-a BJP Foundation Day lawmna ah hian an President Dr. K. Beichhua MLA chuan BJP Foundation Day lawm nan BJP Flag a pawt pharh a, hemi puala inkhawm hi State Secretary, Lalrinkima chuan a kaihruai a ni.