Tlabung atangin Oil Palm rah vailiam a ni

Inrinni khan Tlabung-ah Oil Palm hralhchhuah tur vailiamna (flag off) hun hman a ni a, chhungkaw pasarih te tharchhuah Oil Palm rah kg 4175-a rit chu Lunglei District Agriculture Officer Dr. Samuel Laliansanga chuan a vailiam a ni.

Tlabung Block huamchhungah hian Oil Palm chingtu chhungkaw 80 vel awmin, ram hectare 150 vela zauvah an ching a. Tlabung, Tipperaghat leh Khojoysuri khuaah te Oil Palm hi chingin Agriculture Department chuan kut hnathawktute hnenah Oil Palm tiak (seedling) hi an sem thin a. A chinna senso – a hmun enkawlna, Half moon Terrace laihna, leilawn leh a sengna (harvesting pole) te chu farmer-te hnenah hian a pe thin bawk.

Oil Palm hralhna chungchangah Agriculture Department leh Patanjali Foods Ltd. Company te chu thawkho in, Company hian Oil Palm rah, 'Fresh Fruit Bunch (FFB)' hi an lei thin a. Tun dinhmunah chuan Bukvannei-a Godrej Company te Oil Palm Mill-ah an la hralh chhawng rih a. Lawngtlai District-a Liapha khuaah Patanjali Company hian Oil Palm Mill buatsaih mekin kumin 2026 hian hawn theih a nih besei a ni bawk. Tun tuma Oil Palm vai liamnaah hian Tlabung-a Oil Palm chingtute, Agriculture & Farmers Welfare Department-a thawktute leh Partner Company Patanjali Foods Ltd aiawhte an tel a. Tlabung Block huamchhunga Oil Palm chin leh hralhchhuah chungchanga hmalak zel dan tur leh hmasawnna tur hrang hrang ruahmanna te an sawiho nghal bawk.