AMC Inthlanpui atan Campaign beingawrh mek

Tun thla ni 21-a Aizawl Municipal Corporation (AMC) inthlanpui neih tur atan Political party hrang hrangte chuan ngawrh takin Campaign an nei mek.

AMC Inthlanpui neih turah Campaign hun a tlem tawh avangin Political Party leh Candidate ten hmun hrang hrangah Campaign hi an nei mek a, Party hrang hrangte hian Veng hrang hrangah Street Campaign neih chu an Campaign dan langsar ber a ni a, hei bakah hian Candidate leh anmahni tawiawmtu ten hmun hrang hrangah Vote dilin an leng bawk a, tun thlengin boruak duhawm lo a thlen hriat a ni lo.

AMC Inthlan neih turah hian political party pathum - Indian National Congress (INC) Mizo National Front (MNF) leh Zoram Peoples Movement (ZPM) ten Ward tin chuhin Candidate 19 theuh an nei a, Bharatiya Janata Party (BJP) pawhin Ward 11 chuhin Candidate an nei bawk. He inthlanpui ah hian Vote thlak ni atan April ni 21, 2026 ruat a ni a, zing dar 7:00 atanga tlai dar 5:00 thleng vote thlak hun hawn a ni anga, he inthlanna a Vote tla te hi April ni 27, 2026 zing dar 8:00 atangin chhiar tur a ni.

AMC inthlan hi tum 3 neih a ni tawh a, inthlan hmasa ber kha November ni 3, 2010-ah neih niin MNF party-in seat 6, ZNP leh INC-in seat 5 ve ve leh MPC-in seat 3 an la a; Inthlan vawi 2-na hi November ni 26, 2015-ah neih leh niin MNF-in seat 11, INC-in seat 7 leh MPC-in seat 1 an la a ni.

Inthlan hnuhnung ber chu February ni 16, 2021 khan neih leh a ni a, MNF-in Seat 11 lain ZPM-in seat 6 leh INC-in seat 2 an la a. Vanduaithlak takin Ward No. VI Corporator John Zosangliana Ralte (MNF) chu a boral avangin by-election neih a ni a, hetah hian ZPM Candidate H Lalremtluanga thlantlin niin, term tawp thlengin MNF-in Seat 10, ZPM-in seat 7 leh INC-in seat 2 an nei ta a ni.