AMVCA Logo thar tur LAD Director in a tlangzarh

All Mizoram Village Council Association (AMVCA) te Logo thar chu Zirtawpni khan Local Administration Department Director, Dr. Lalngura Tlau chuan a tlangzarh.

LAD Director Pisa-a AMVCA Logo tlangzarhna hunah hian Dr. Lalngura Tlau chuan Village Council-te’n khawtlang hmasawnna tur atana an lawmman lam ngaihtuah miah lova theihtawp an chhuah thin leh sawrkar kut ke tangkai leh pawimawh ber an ni reng thei chu lawmawm a tih thu a sawi a. Mizoram sawrkar in VC-te hmasawnna tur a ngaihpawimawh zel avangin an Department pawhin hmachhawp lian tak tak an neih thu a sawi a. Ram hmasawnna tur atana a lungphum pawimawh hmasa ber VC-te chu theihtawp chhuah a hmasawnna kawng zawh zel turin a fuih a ni.

He hunah hian AMVCA General Secretary Lalropuia chuan AMVCA Logo Design sawifiahin AMVCA chuan Logo hi a duh apiang tana Design thei turin ruahmanna a siam a, Design thehluh zingah V. Lalnunsanga, Graphic ART Design chu Director LAD hovin April ni 2, 2026 khan thlan a lo ni tawh a. Village Council hian tunhmain Logo an la nei ngai lo a, tuna Logo tlangzarh tak hi an Logo hmasa ber tur a ni.