State pali te dinchamphaphak lawmna neih a ni

Mizoram Larsap, General (Dr) Vijay Kumar Singh chuan nimin khan a chenna Lok Bhavan Durbar Hall-ah Bihar, Rajasthan, Odisha leh Himachal Pradesh-te State dinchamphaphak lawmna a buatsaih.

'Ek Bharat Shreshtha Bharat' hmalakna hnuaiah heng State dinchamphaphak lawmna ah hian Larsap chuan heng State te hi duhsakna hlanin, an State chanchin langsar leh chhuanawm tak takte a tarlang a, “State tinte hian danglam bikna an nei theuh a, thatna riau an neih mai bakah theihna nasa tak an neih avangin hmasawnna nasa takin heng State-ahte hian a thleng a ni,” a ti a. “State/UT-te dinchamphaphak kan inlawm sak tawn thin hmang hian midangte hnam ziarang, nunphung leh tih dante kan hriat thuk lehzual phah a, hei hian inpumkhatna siamin India chu ram danglam bik a nih zia a lantir a ni,” a ti bawk.

March ni 22, 1912 khan Bengal Presidency atangin Bihar a lo piang a. Rajasthan hi March ni 30, 1949 khan Jodhpur, Jaipur, Bikaner leh Jaisalmer lal ramte inzawmkhawm chuan siamin Greater Rajasthan tia vuah a ni a. Odisha hi tunhma chuan Bihar hnuaiah awmin, April ni 1, 1936 khan State puitlinga hlankai a ni a, tawng hman behchhana India rama State piang hmasa ber a ni. April ni 15, 1948 khan Himachal Pradesh hi Indian Union hnuaia Part C State ni turin a lo piang a. January ni 25, 1971-ah state puitlinga hlankai a ni.