MZP Federal Council Sitting nei

MZP rorelna sang ber dawttu Federal Council vawi 60-na thukhawm chuan Mizoram-a Inner Line Permit (ILP) hman dan kalphung chu tun aia khauh zawk leh changkang zawka kalpui a nih theih nana hmalak an rel.

MZP Federal Council vawi 60-na hi nimin khan neih niin MZP President Dr. C. Lalremruata chuan Mizoram-ah hnamdang (Vai) phalna neilo a lokal an tam thu sawiin, hnam inhungbikna ILP venhim chu mitin mawhphurhna a ni a, ILP hmang tangkai tur leh check ngun lehzual turin hmalak a tul thu a sawi a. ‘Pi leh pute atanga Zofate luah chin ram rorelna pakhat hnuaia awm’ tih chu MZP-in an kal pui reng tih sawiin, Zofate insuihkhawm chu an thil tum pawimawh tak anih thu leh theihtawp an chhuah zel dawn tih a sawi a ni.

MZP Federal Council hian Zirtirtu indaihlohna rualkhai zawka semrual a nih theih nan nasa zawkin Sawrkarin hma la rawh se tih leh Mizoram State University din turah dik leh felfai taka hnalak a nih theih nan hmalak an rel bakah Zirna In hrang hrangah Zounun Zemawi inzirtirna kalpui a nih theih nana hmalak te leh Common University Entrance Test UG/PG Exam Center tam zawk Mizoram-ah a awm theih nan hmalak leh Mizoram College te'n Principal nghet an neih theih nan a tul angin Sawrkar-in hma la rawh se tih chu an pawm a ni.