Mizoram-a khualzin lo lut dawnsawn dan tura thawhho theih dan tur sawihona neih a ni

Tourism Minister Lalnghinglova Hmar chuan Mizoram-ah kum 2025 chhung khan tourist mi nuai 8 chuang an awm thu leh kumin hian a aia tam an awm an rin thu sawiin, “Kan culture leh khawtlang nunphung ti dal si lova mikhual kan lo dawnsawn a, inven tulna kawngah kan lo inven theihna’n nasa taka zirtirna kalpui a ngai,” a ti.

Mizoram tlawhtu tourist pung zel lo dawnsawn leh inzirtirna kalpui kawngah thawhho theih dan tur chungchang ngaihtuahin nimin khan Tourism Department Officer te leh Central Young Mizo Association (CYMA) hruaitute chu Tourism Minister Lalnghinglova Hmar hovin a Pisa-ah an inkawm a, he hunah hian Tourism Minister chuan Mizoram tlawhtu pung zel chu sum leh pai leh a tha zawnga Mizoram tarlan kawngah thil lawmawm tak a nih rualin, thil tha lo ken tel a neih theih avangin fimkhur taka lo dawnsawn a tul tih a sawi a. “Kum 2025 September ni 13-ah Sairang thleng Rel a lo lut a, October thla atang khan chawhrualin thlakhatah mi nuai khat chuang Tourist kan la nei a ni. Kum 2025 chhungin tourist nuai 8 chuang an awm a, kumin ah a aia tam an awm kan ring. Hengte hi kan culture leh khawtlang nunphung ti dal si lova mikhual kan lo dawnsawn a, inven tulna kawngah kan lo inven theihna’n nasa taka zirtirna kalpui a ngai a, YMA nen thawhho kan duh a ni,” a ti.

He hunah hian Central YMA President R. Lalngheta chuan Mizoram rawn tlawhtute’n hun hlimawm leh nuam tak hmang se tih chu Central YMA duhdan a ni tih sawiin, chutih rualin a sahawk lutuk leh a ram neitute awm tinuam lo zawnga khawsa an awm palh thei tih a tarlang a. Chutiang a thlen loh nan Mizoram mipuite bakah tourist te hriattur pawimawh, an cham chhunga an tih tur leh tih loh tur (Dos and don’ts) mumal tak siam tha a tih thu a sawi bawk.

He inkawmhonaah hian inzirtirna kalpui chungchanga sawrkar leh Central YMA thawhho theihna hrang hrangte sawiho a ni a.  Mizorama Tourist Site hrang hrangte hlutna leh nihna pho-chhuak tur leh hlawk zawka Tourist nen hun an hman theih dan turte pawh sawiho a ni bawk.