Serchhip District Government Land Authority thutkhawm nei

Nimin khan Serchhip-ah District Government Land Authority chu an Chairman leh District Bawrhsap, Paul L. Khuma hova thukhawmin Thenzawl Peace City (Greenfield Project) hmalakna kal zela sawrkar ram hman dan tur leh District chhunga hmasawnna hna hrang hrang thawh dante sawiho a ni.
He thutkhawm Serchhip DC Meeting Hall-a neih ah hian Thenzawl Peace City hmalakna hnuaia Dilpui area-a AH&Vety Department ram acre 140-a zau, ranchaw chinna hmun (fodder plantation) leh hnathawktute hmunhma (residential quarters) te chu UD&PA Department in hmasawnna hna an thawhna tur atana hman tura ruahman a nih dan te sawiho a ni. Helai hmun hi Neihloh khua-a sawn (relocate) tura rel tawh a nih laiin AH&Vety Department hotute chuan Neihloh hi khawl hmanga huan leh rante enkawlna (mechanized farming) kalpuina atan chuan hmun remchang nia an hriat loh thu sawiin, thuneitu sang zawkte nen ngaihtuah that leh tura rel a ni.

Serchhip-a Women & Child Development Office sakna tur atana P&E Veng, Soil Department ram, UPC-NEI Biak In thlang chu chiang zawka ennawn (location specific identification) leh nise tih a ni bawk a. Leisang kawi-a Anganwadi Centre awm mek chu nunau leh naupangte tan a him tawk loh avangin, AOC Veng-a Soil Department ramah sawn tura ruahman a ni bawk.

Bawrhsap Paul L. Khuma chuan sawrkar ramte chu ram leh mipui tan vek a nih avangin uluk leh chak zawka humhalhna kalpui nih tur thu a sawi a. Ramri hung (fencing) leh chhinchhiahna (demarcation) felfai tak neih a tul thu te, sawrkar leh vantlang ram nek (encroachment) thinte lakah chak zawka hma lak a nih tur thu te a sawi bawk a ni.